根據香港《Yahoo 新聞》25號報道，韓國警方在近日拘捕一名30幾歲、居住在香港嘅「香港航空」女職員，該職員涉嫌非法存取並出售多名韓星嘅機票預訂資訊，其中包括韓團「防彈少年團 BTS」。

外媒報道指出，韓國首爾地方警察廳 網絡犯罪調查組尋日指，被捕女子利用其工作之便，透過內部訂票系統搜尋明星嘅姓名及其出生日期，取得機票預訂資訊，包括座位號碼。

警方指，該女自2023年至2024年間，出售超過1000筆數據，非法獲利超過1000 萬韓元（約5.4萬港元）。調查顯示，該員工最初應熟人要求，提供明星嘅航班資訊。

之後該女開始利用其職位賦予嘅資訊搜查功能「謀取私利」，並透過社交媒體出售機票預訂資料，並根據明星嘅知名度決定其價錢。

BTS及其經紀公司 HYBE ，近年多次針對航班資訊洩露問題，向航空公司提出法律訴訟。HYBE在聲明中強調，對於非法獲取及銷售旗下藝人航班資訊嘅行為「零容忍」，並同執法機構合作進行調查。

除咗BTS，韓國娛樂圈近年頻爆藝人私隱遭侵犯案，唔少藝人曾遭遇所謂「私生飯」等意圖探尋藝人私生活嘅狂熱粉絲騷擾，非法取得航班資訊，刻意訂購鄰座求近身接觸，已對藝人嘅安全構成威脅。

韓國警方指，正在調查是否有其他人士參與呢次非法交易，協助分發或轉售機票資訊，並將持續加強打擊呢一類行為，確保公眾人物嘅隱私及安全不受侵犯。

多間傳媒最初報道指出，被捕嘅女子任職於「香港航空」，不過「香港航空」隨即回覆傳媒，指該公司並冇員工涉案。該港女嘅正式任職資訊，仍待當局進一步交出新資訊。