根據《香港01》26號報導，港府新一份財政預算案今26號宣布，2025/2026年度所有行政、立法、司法機關、區議會全體人員「一致凍薪」，包括行政長官及政治委任官員；行政會議非官守議員；全體公務員；立法會主席及所有議員，以及秘書處人員；終審法院首席法官、各級法院法官及司法機構人員；以及區議會議員。

唔少網民表示讚同凍薪，但認為公務員及高官薪酬過高，在非常時期更應同市民共渡時艱，甚至覺唔夠應進一步減薪，有指：財政赤字係因你班公務員薪金愈來愈多、高官減人工共渡時艱啦唔該、財赤本身都影響香港士氣㗎公務員仲想獨善其身、話私人公司會跟政府減薪係假設性啫、已經好多學者提出公務員人工過高。

另有唔少網民認為，公務員凍薪並不足夠，應裁減人手「裁冗員先」，並指出深圳公務員人數仲少過香港，證明香港部份公務員工作效率十分低。另有指，應更新工作方式，相信到時唔係唔夠公務員，而係冗員太多。同有人話，都係嗰句，重組公務員架構，合併局長副局長職位，cut啲非必要職位。

部份網民就向公務員「開刀」，除怕打擊士氣，亦擔心私企「有樣學樣」。有稱：公務員人數已經唔夠，仲減薪？一來減低公務員士氣，再者帶動私企跟隨政府一齊減薪，到時經濟只會再差。同有人指，影響晒為我哋香港出心出力嘅公務員嘅士氣。有人認為，公務員加薪提士氣，市民先有信心消費！公務員唔加，我哋大機構點加？

不過，部份網民就提到，公務員一時凍薪減薪對政府長遠財政幫助唔大，亦不認同「減士氣論」，認為需要改變公務員薪酬調整機制，有人話：佢哋所謂嘅凍薪，只係加少啲，因為絕大部份公務員都冇得跳point。就算凍薪都仲有跳point，唔明乜嘢叫公務員士氣？有人戲稱：人工高、福利好、準時出糧、鐵飯碗仲話公務員士氣？