根據《自由亞洲電台》18號報導，在香港再次面臨千億財赤窘境之際，新加坡庫房卻「水浸」。新加坡2024財政年稅收超預期，料將實現64億新幣（約371億港紙）嘅盈餘，佔其國內生產總值約0.9%。其盈餘主要來自「企業利得稅」過去兩年嘅顯著增長，更成為政府經常收入嘅最大來源。

至於2025財年，盈餘料將繼續保持，預計為68億新幣（約394億港紙）。新加坡總理兼財政部長 黃循財，周二18號在國會報告中指出，2024財年盈餘遠高於最初預計嘅8億新幣，並成功扭轉2023財年26億新幣嘅財赤。

根據 黃循財所指，新加坡嘅盈餘主要來自「企業利得稅」過去兩年嘅顯著增長，該項稅收自3.2%增至2024財年預計嘅4.1%，並超越「國家儲備淨投資回報貢獻」（NIRC），成為政府經常收入嘅最大來源。

企業利得稅增長「超出預期」，主因為近年有唔少跨國企業、主要係中港企業，為因應投資策略變化，選擇將更多高端活動，由香港搬遷至新加坡。另一原因係特定行業嘅周期性波動，如金融業、批發貿易業在新加坡嘅投資增加。

黃循財表示，隨著2027財年開始實施國內附加稅，大型跨國企業嘅有效稅率將提高至15%，預計會進一步增加企業利得稅收入；不過呢部分增收嘅具體金額，將取決於有關跨國企業，是否仍認為在新加坡投資具吸引力。

黃循財續指，隨著政府收入增加，支出亦相應提高，政府將向「保健儲蓄」基金（Medisave）注入30億新幣（約174億港紙），協助市民應對健保保費上漲。此外，政府計劃加大基礎設施投資，譬如開發樟宜5號客運大樓以及能源轉型，以提升國家競爭力。

同新加坡唔同，香港政府將於下週三26號公布新一份《財政預算案》，預料將面臨重大財政挑戰。舊年12月，財政司司長 陳茂波在立法會財經事務委員會中，首次將本年度香港財赤預估調至1000億港元，遠高於年初預算案估計嘅481億。

根據港府公布數字，自2020/21年度以來，香港已連續3個財年錄得赤字，3年分別為負「2325億、1223億、1002億」。若計及今個財政年度1000億赤字，港府在近5年內已有4年錄得赤字，合計蝕約5550億。

至於鄰近香港嘅澳門，其財政情況亦較為穩健。前行政長官 賀一誠舊年11月卸任前曾表示，澳門已擺脫疫情帶來嘅財赤，公共財政恢復盈餘。當地財政儲備截至2024年9月，已達6170億澳門紙（約5980億港紙），較2019年增加435億。澳門政府預計2025年度盈餘為77億澳門紙，並宣布連續第18年向市民派發現金，永久居民繼續有1萬元可攞。