根據《Yahoo 新聞》21號報導，民主黨中委會尋晚召開會議，取得解散政黨共識，會上通過決定成立三人小組，跟進未來解散及清盤安排，時間表稍後公布，解散議案須由會員大會表決。民主黨主席羅健熙今朝21 號在《商台》節目「在晴朗的一天出發」表示，中委會在舊年12月先改選，當時並無解散念頭。

佢同意現時推動解散一事「較突然」，而的確係個較急嘅決定。由聽到唔同消息至商討，總之都係呢幾個星期嘅事，但背後有何具體內容就不便透露。至於民主黨前立法會議員 李華明亦在同一節目表示，曾經同來自內地嘅「溝通人」問過，民主黨能否在12月立法會選舉取得提名，但收到回覆係「仲要捱到12月咩你哋？」。

羅健熙在節目中針對主持所問「難言之隱」表示，因上述對話「得出解散意向」。羅健熙並話，大家可各自去理解，用你哋嘅方式去理解。並認為「在時間線上」已經攤出資訊。舊年12月選完中委後，雖然黨內財政資源緊絀，但一直都係話「冇錢就慳住用」，到現時突然有解散決定，固然令大家意外，但再多內容已不適對外講太多。

而一直同建制關係友好嘅民主黨前立法會議員 李華明，亦在節目中受訪，針對是否獲「中間人」訊息一問，佢就指民主黨嘅歷史任務已完結。李華明並回應，一直並非透過中間人收訊息，並話：我對嗰啲係共產黨嘅溝通人，係會更直接啲。佢直言自己會同唔同部門機構溝通。

李華明指自己之前曾經問及，12月立法會選舉民主黨仲有冇提名呢？而對方好簡單咁答，「仲捱到12月咩你哋？」跟住就話「收皮啦你哋」。李並透露近排同中間人嘅溝通近況，對方多直接表達「摺埋好喇你哋」，好直接、完全冇掩藏。

李華明一直認為民主黨應繼續運作，佢並指自己唔會形容解散係個「合理」嘅決定，只可講係無可奈何，加上現時黨內已無錢，點延續落去呢？李又指，民主黨過往都能夠資助，以至借錢俾黨友出選，但而家已經冇可能，亦冇可能叫黨員自己攞真金白銀出去選。

李華明又提到，之前有黨友期望出選已收到騷擾，黨友聚餐都可以遇上千奇百怪理由而被取消，佢都唔希望年輕黨友再受到牽連，亦驚會有人突然朝早 6 點鐘上屋企。佢並明言，日後若舉行會員大會，將「沉痛地、無奈地」投下贊成票。