根據《香港經濟日報》17號報導，為增加香港電影人喺海外嘅曝光率，並開拓更多進軍國際市場嘅機會，香港文旅局、文創處、香港電影發展局，率領業界代表團，參與第75屆柏林國際電影節，並喺2月14號於當地舉辦「香港之夜」招待會。

香港導演 劉韻文啱啱喺辛丹斯電影節為佢嘅新作品《花明渡》舉行世界首映，而「香港之夜」呢晚佢都有現身，仲指呢個招待會造就咗一個機會，令佢認識更多歐洲嘅電影人，同時亦開心「香港之夜」可以展示到香港電影嘅新動向之餘，亦體現到政府對業界嘅支持。

由文創處文創產業專員 曾昭學率領嘅代表團，成員之一嘅《虎毒不》監製 龍國瑤、《東風破》導演兼監製 麥婉欣，及《敗走麥城》監製 蔡浩泉，就出席合拍電影巿場舉行嘅座談會、工作坊、招待會等，同多地嘅電影人討論交流。

文創處電影製作總監 陳世敏亦喺合拍電影巿場嘅環節，介紹香港「歐亞文化交流電影製作資助計劃」，並同監製 龍國瑤參加咗歐洲電影市場舉行嘅圓桌工作坊，分享香港拍攝經驗同優勢。此外，由新進導演 李駿碩編導嘅電影《眾生相》，獲選入今屆柏林電影節「Panorama」單元，佢同男主角 張迪文及一眾主創出席世界首映。

而文創處亦資助香港電影發行商喺影展期間進行巿場展映，包括「高先電影」嘅《虎毒不》，以及香港電影發展局資助、「銀都機構」發行嘅《紅豆》，望令國際業界欣賞香港電影，促成交易機會。