根據台灣《中央社》17號報導，中共總書記 習近平當日出席民營企業座談會，在會上向企業家信心喊話。習話：民營企業家大顯身手正當其時。佢並盼企業家「先富促共富」，並強調在困難中要保持「愛拚會贏」嘅精氣神。

《新華社》報導指，座談會上發言嘅民企負責代表有6人，分別為：「華為」任正非、「比亞迪」王傳福、「新希望」劉永好、「韋爾半導體」虞仁榮、「宇樹科技」王興興、「小米科技」雷軍，6人就新形勢下促進民營經濟發展提出意見及建議。

據《央視新聞》畫面，網路巨頭「阿里巴巴」創辦人 馬雲亦有出現在座談會上，今次係2020年 馬雲因批評中國金融體系嘅演講得罪高層後，首次現身官方高層會議，被視為官方提振民企信心嘅動作。但根據報導，馬雲並未在會議中發言。

此外，中媒整理今次出席嘅民企代表，仲包括有「寧德時代」曾毓群、「深度求索」（DeepSeek）梁文鋒、「騰訊」馬化騰。上述3人同未有在會上發言。

據報，習近平在會中強調，黨同國家對民營經濟發展嘅基本方針政策，已納入「中國特色社會主義」制度體系，將一以貫之堅持、落實，不能變亦不會變。民營經濟發展前景廣闊、大有可為。又指：廣大民營企業及民營企業家「大顯身手正當其時」。

習並重申，黨同國家毫不動搖「鞏固及發展公有制經濟」，毫不動搖「鼓勵、支持、引導非公有制經濟發展」；保證各所有制經濟依法平等使用生產要素、公平參與市場競爭、同受法律保護，促進各種所有制經濟優勢互補、共同發展，「促進非公有制經濟健康發展」以及「非公有制經濟人士健康成長」。

不過 習近平又再次兜圈話，當前中國民營經濟發展面臨嘅困難及挑戰，總體上係在「改革發展、產業轉型升級」過程中出現嘅，係局部嘅而非整體嘅，係暫時嘅而非長期嘅，係能夠克服嘅而非無解嘅。

習近平指，要將思想及行動統一至「黨中央對國內外形勢嘅判斷」上，統一至「黨中央對經濟工作的決策部署」上。仲「信心喊話」強調，要在困難及挑戰中睇到「前途、光明、未來」，保持發展定力、增強發展信心，保持「愛拚會贏」嘅精氣神。

針對促進民企發展，習近平話，要持續推進基礎設施競爭性領域向各類經營主體公平開放，繼續使大氣力解決民企「融資難、融資貴」問題。要著力解決拖欠民企帳款問題。要強化執法監督，集中整治「亂收費、亂罰款、亂檢查、亂查封」，確實依法保護民企及民企家嘅合法權益。

習近平仲要求民企加強自主創新，努力為推動科技創新、培育「新質生產力」等國家大戰略作出貢獻，更要求要力所能及「參與公益慈善事業」。據報，座談會由中共政治局常委 王滬寧主持，另有2名常委 李強、丁薛祥同出席今次會議。

今次係自2018年以來，習近平第4次召開同民企相關嘅座談會。在2018年11月嘅座談會，習近平親自為「國進民退論」滅火；2020年7月嘅座談會，對所謂「國內大循環」加已澄清，聲稱「絕非關門」封閉運行；2024年5月嘅座談會，習強調改革無論點改，「堅持黨全面領導」等4大堅持絕對不能動搖。