根據《Yahoo 新聞》17號報道，香港記者協會（記協）原訂在上周六15 號舉行 57 周年籌款春茗晚宴，但前一日突遭酒店通知因「樓層漏水」致電力不穩，需取消預訂，晚宴需延期舉行。對此，記協主席 鄭嘉如表示，對酒店嘅處理方式感驚訝，認為解約原因應正當，並經得起事實考驗。現時記協將晚宴改期至2月24號，在另一間酒店舉行，而記協仲有 Plan C。鄭嘉如認為，施壓者未必係政府，可能係其他人士嘗試騷擾記協，但強調即使無法舉行晚宴，同可順利籌款。

鄭嘉如在今朝17號受商台節目《在晴朗的一天出發》訪問時表示，早在預定場地時已表明機構身份，交代活動目的或內容等，對方稱「一定無問題、都係做生意」。鄭話，當時負責預訂場地嘅執委已提醒酒店：可能舉辦記協活動「未必咁簡單」，但對方確鑿回應稱：我哋都係做一宗好普通嘅生意啫。未料到上周四13號，酒店方通知稱發生「小型爆炸」，記協一方隨即關注有否報警，惟對方之後又改口稱「漏水」導致起火，因電力不穩無法供應食物。

鄭嘉如續話，聽到酒店嘅理由後，曾提出多個替代方案，包括轉地方、改菜單，甚至只租場唔食飯，但對方都拒絕指會退錢，因此記協要取消當晚活動。到周五14號記協通知參加者後，隨即有傳媒赴酒店視察，發現現場「燈火通明」，繼續在記協原訂位舉行情人節活動。

鄭嘉如表示，對於酒店處理方式感到驚訝，對於香港人同係一個好大警號。佢解稱，今次涉事「富豪酒店」屬於富豪國際集團，係一間上市公司，惟簽咗商業合約後「褪軚」。即使「褪軚」一事時有發生，而合約多會有條款註明容許取消活動嘅特例，而記協今次嘅合約就包括因「技術問題」而取消嘅條款，所以對方強調係「技術問題」。

對此，鄭嘉如認為：你解約要「褪軚」，無問題，但你個原因要正當，同埋經得起事實嘅考驗。鄭又稱，如果解約原因非正當，對於富豪呢個品牌來講好不幸。現時記協已將晚宴改期至2月24號，在另一間酒店舉行。

對於是否真可順利舉行，鄭嘉如表示，如果第二間酒店都唔得，都仲有第三個 plan。鄭強調，純粹係希望俾會員相聚，對於記協來講「就算 Plan B 唔得，Plan C 唔得，財務上一定係 net positive，反而對酒店方就蝕。

鄭嘉如話，活動人數大概200人，預計酒店在活動前兩星期已預訂食材，而家活動無法舉行，加上蝕場租係「倒蝕」。佢指，觀乎現時香港市道，酒店理應好需要做生意先係。

另外，鄭嘉如認為，記協在政府眼中應屬正當組織，因為冇正當理由阻礙記協工作，所以有啲人士，未必係政府，都可能嘗試騷擾我哋，用其他方法等我哋無法進行平時做嘅嘢，可能向第三方、酒店或其他地方施壓，等你煩。