根據香港《Yahoo 新聞》今日17號報導，朝早消息指，港警國安處人員今朝再帶走黃大仙前區議員 劉珈汶一名親屬，赴警署協助調查一宗案件。早在上周一10號，國安處已帶走 劉珈汶兩名親屬助查。警方國安處在舊年12月24號，公布新一輪通緝名單，包括 劉珈汶、鍾劍華等 6 名海外港人，6 人各被警方以 100 萬港元懸紅通緝。

劉珈汶被指涉及煽動分裂國家罪，以及勾結外國或境外勢力危害國安罪。國安處指，劉珈汶於2021年10月至2024年5月期間，以「香港民主委員會」要員身份發文，並多次透過發表演講、在社媒發布貼文或影片等唔同形式，鼓吹將香港特別行政區自中華人民共和國分離出去、請求外國對中華人民共和國及香港特別行政區進行「制裁」、封鎖及採取其他敵對行動。

劉珈汶於2021年7月18號已離港，裁判官遂簽發手令通緝佢歸案。被問到接連有被通緝海外港人嘅家屬、前同事等被國安處帶走助查，警務處副處長國安專員 簡啟恩在上周二11號回應指，危害國安係嚴重罪行，警方一直自多個渠道調查案件，其中向被通緝人士身邊人調查及搜集資料「係一貫做法」，更強調係「依法辦事」。