根據香港《信報》12號報導，英國《金融時報》（FT）報道指出，四大會計師行之一嘅「羅兵咸永道」（又稱「普華永道」），因對「恒大」（3333.HK）審計問題，遭國家財政部禁止營業半年以來，已有數十名中國合夥人因此離職。

據財政部註冊資料，普華永道自舊年12月及今年1月共有66人「不再為公司合夥人」，惟目前暫未清楚佢哋是否已離開該公司。普華永道中國發言人表示，過去數月「普華永道（中國）」一直在重塑業務，當中部分合夥人已退休。

報道引述另一份登記冊顯示，截至本周二11號，普華永道共有277名註冊股權合夥人，其中包括65名離職合夥人，意味著其股權合夥人數目減少逾兩成，幅度係5年最大。

國家財政部及中證監在舊年9月對普華永道實施6個月禁令，並罰沒違法所得及罰款合共4.41億人民幣，原因係該企業對「恒大」嘅審計過程中隱瞞，甚至縱容欺詐行為。普華永道舊年合夥人離職率為個位數，高於競爭對手「德勤、安永、畢馬威」。

根據普華永道披露資料，在禁令實施前一年，即係2023年9月，「普華永道（中國）」在中國內及香港共有1048名合夥人，包括股權及非股權合夥人。

至於不再擔任合夥人嘅包括普華永道亞太及中國區前主席Raymund Chao、普華永道中國區前財務總監Gavin Chui、負責國有企業客戶嘅北京合夥人Jim Chen，以及負責華北審計部門嘅Bur Chan。

報道稱，普華永道中國廣州分公司有幾名合夥人已不再擔任其職務，該分公司在恒大被罰後被迫解散。中國現行法規禁止國企及中國上市公司，聘用在過去3個會計年內曾被處罰嘅審計師。