根據台灣《中央社》22號報導，中國奢侈品市場面臨「消費萎縮、出國旅遊復甦致消費者外流」等影響，整體市場成長趨緩。報告顯示，中國奢侈品市場2024年銷售額估計下滑18%至20%，預計2025全年表現將同2024年持平。

中媒《經濟觀察報》報導指，市場研究機構「貝恩公司」（Bain & Co.）21號發布「2024年中國奢侈品市場報告」。報告指出，受消費者信心不足、出國旅遊復甦、消費外流加劇等影響，舊年中國奢侈品市場銷售額預計下降18%至20%，基本跌回2020年嘅水準。

其中，第3季降幅最大，第4季表現因中央頒布一系列刺激經濟措施而有所改善。自品項來睇，美妝品表現較好，尤其係香水及超高級護膚品。而珠寶、腕錶嘅表現最差，銷售額降幅為28%至33%，主因為消費者偏好轉向其他保值資產及體驗型產品。

「報告」宣稱，位於海南島嘅免稅市場，當地面臨中國其他地區免稅店擴張，以及鄰近國家嘅搶客壓力，加上中國電商平台「激烈價格戰」，2024年嘅免稅銷售額下降約29%。

「報告」提到，隨著出國旅遊重啟，2024年作為轉折點，奢侈品「疫情紅利期」結束，預計2025年上半年中國嘅奢侈品市場，將會延續舊年嘅頹勢，但對下半年的市場前景持「謹慎但樂觀」態度，預計2025全年表現將同2024年持平。

「報告」又指，中國奢侈品市場萎縮受「出國旅遊回暖、境外匯率優勢」嘅影響。數據顯示，境外市場占中國消費者奢侈品消費總額嘅比例，提高至約40%。

其中，中國消費者在歐洲市場嘅奢侈品消費額，已恢復至2019年嘅50%，亞太地區則達到2019年嘅120%。但境外市場成長不足以抵消中國市場下降，2024年中國消費者在全球嘅奢侈品消費總額，仍下降大概7%。

「貝恩」公司全球合夥人 邢微微表示，出國旅遊將會持續復甦，預計將對中國奢侈品市場施加進一步壓力。佢認為，當下困境唔會削弱中國市場對奢侈品牌嘅吸引力。長期來睇，中國市場龐大嘅奢侈品消費群，仍係全球奢侈品消費嘅重要成長引擎。