根據香港《獨立媒體》17號報導，「宏美廣告娛樂集團」在早前聲稱，有意邀請西甲球隊 巴塞隆拿來港作賽，卻遇啟德體育園「阻撓」，警方在尋日拘捕該集團行政總裁 黃浩霆，指佢涉嫌使用虛假文書，對外公布虛假體育園電郵。近日傳媒再揭出 黃浩霆更多問題，包括舊年聲稱有意收購免費報章《am730》，最後「彈票」令告吹交易。

媒體《am730》創辦人 施永青今朝在《商業電台》節目中，憶述同 黃浩霆「交手」嘅過程，並指對方租用嘅空間係共享辦公室，交易當日仍未兌票就催促簽約，下屬後發現該支票逾期，黃宣稱同銀行相熟「打個電話」就辦妥，但最終仍彈票。施永青認為，黃浩霆受人指示，背後或有力量想試探「某啲人對某啲事嘅睇法」，不過都坦言，黃嘅手法「好低級、好兒戲」。

黃浩霆尋日被以兩項罪名拘捕，分別係「行使虛假文書、虛報有人犯罪」，佢被指涉及偽造啟德體育園電郵，以及虛報遭記者勒索嘅1000萬元。警方尋日在簡報會中表示，唔排除有人「一廂情願以為自己有能力促成國際賽事」，但因經驗不足及安排失當，最終事與願違，並想推卸責任、誤導傳媒。

黃浩霆舊年曾用市場推廣公司代表Edwin Wong 嘅身份，洽談收購免費報章《am730》，但最終卻因為100萬「誠意金」支票「彈票」，令嗰次交易告吹。《am730》創辦人 施永青曾公開指買家「無誠意、不可信」。

施永青今朝在商台《在晴朗的一天出發》憶述嗰次同 黃浩霆接洽嘅過程，指自己其實已唔記得對方嘅名，但對其樣貌有少少印象。佢指自己曾同 黃浩霆兩次接觸，已覺得「不對路」，有次派下屬去對方公司「攞嘢」，但黃推搪「唔好上去住，我攞一攞落嚟畀你」。另次佢交代下屬攞文件資料俾黃，登門後卻發現「office唔見人」。隨後同事又發現其支票過期，最終交易都告吹。

施永青指，同事曾討論是否追究 黃浩霆開空頭支票，佢判斷「唔係佢自己想做，佢都係受人指使」，並反問：「普通人唔會做一件事遲早穿煲、證明自己無誠信嘅事？梗係唔會做，梗係有人畀啲好處佢」。施永青直言：上次做完應拎到啲報酬吖，而家又搞第二單喇，呢啲搞唔得幾多次㗎咋。

施永青形容 黃浩霆採用嘅手法「好低級、好兒戲」，而對於 黃浩霆假扮有意收購《am730》嘅用意，施永青估計對方想藉已簽署嘅待履行合約，話畀人知佢收購緊《am730》，而施生都簽咗個名，惟最終用途就不得而知。由個人經驗來睇，估計「唔知有咩背後力量，想攞佢做試驗，或者睇下某啲人對某啲事嘅睇法」。

總結今次事件佢笑言：佢幫我買嘢啫，佢畀錢我咪賣，佢唔畀錢我都無損失㗎，花咗小小時間啫」，佢事前冇查家宅，究竟「有無料到」，睇張支票過唔過到數咪得囉。

對於今次拘捕事件，主持問 施永青會否主動向警方提供更多資料，以指證其過往行為，施表示：一單還一單，相信佢嘅資料亦對案件「幫唔得幾多手」，施又指，對方已好可憐，「我都無謂踩多佢一腳」。他估計對方在「邀請」巴塞隆拿事件上，是「扮有實力、有資格辦盛事」，但背後有咩目的，不宜猜度。

到底佢是否仍有意出售《am730》？施永青強調「從來冇話要賣」，自己將《am730》股權捐贈予慈善基金，如果收到好價，不賣將會「對唔住基金獲益者」，故「唔可以唔考慮」，不過佢同時指出，自己「想做好份報紙多過想舊錢」。