根據《自由亞洲電台》8號報導，已解散嘅香港支聯會，因拒絕國安處要求提交資料被控，其前副主席 鄒幸彤、前常委 徐漢光、鄧岳君，早前被判罪成判監4.5個月，三人隨後向終審法院提出終極上訴，案件在周三8號聆訊。

目前人在獄中嘅 鄒幸彤，在審前透過友人發出公開信表明，要「持續去戳破權力嘅謊言」，並認為「只要我哋未不放棄，呢座城市就唔會死」。

公開信首先回憶3年前被國安上門拘捕嘅情況，鄒表示，支聯會被安上一個莫須有嘅「外國代理人」罪名。佢強調，支聯會非外國代理人，亦拒絕做呢個角色。

鄒並表示，案件已至終審階段，慨嘆過去未能成功改變政權嘅「劇本」，未能救下任何常委，同未能救下支聯會。幾年來，政權根本攞唔出證據，所謂「外國代理人」嘅指控，根本係警察一句「相信你是代理人」你就係。

佢認為，案件有如「國王嘅新衣」，如果法庭決定「除低件衫陪國王裸奔」，實際上係將法庭嘅尊嚴都賠上。如果我哋嘅目標係結束專政、建設民主，咁就應持續去戳破權力嘅謊言，截斷佢哋力量嘅來源，係我哋必經之路。

佢並承認，目前形勢似乎「強弱懸殊」。佢認為，香港不是「lost cause」，只要未放棄，呢座城就唔會死，佢並呼籲大家「衝破自己定義為輸家嘅地獄」，搵返自己嘅方向及目標。