根據《自由亞洲電台》（RFA）7號報導，香港財政司司長 陳茂波上月估算指，港府財赤達一千億上下；短短月內佢又改口指，財赤少於一千億，並大談要滅赤，重點策略以節流為主。

之後社會各界紛紛獻策，有立法會議員建議減少基建、要求高官減薪、減少公務員編制。而作為納稅階層嘅香港市民，究竟希望政府點樣減赤？個答案就係：高官帶頭減薪。

RFA記者在周二7號午，在旺角一帶隨機對市民作街訪，在7名受訪者中，有4名都覺得高官應帶頭減薪。廖女士認為，政府各部官員應考慮凍薪，較高層次嘅官員應考慮減薪，同市民共度時艱。

楊女士對此表示認同，認為高官凍薪較實際。尤其高官月薪好高，各個都幫忙少少，好過叫啲低層公務員減薪、凍薪。陳生同贊成由減薪入手，佢話：普通市民人工已減無可減，港府開支又咁大，公務員減人工係必然嘅唯一方式。

有市民認為，如要繼續推北部都會區及明日大嶼，應待財政狀況回復正常先再考慮；至於減少社會福利，亦係可行嘅辦法之一。面對財政儲備自2019/2020年度嘅11,603億，跌至舊年11月嘅5,914億，入不敷出似乎早已成為港府財政嘅顯學，考驗官員嘅應受力。