在上週五20號舉辦嘅「皇馬球星對巴塞傳奇」表演賽，除咗爆出活動管理風波之外，同引發球迷同業界人士批評球賽門飛「定價過高」嘅爭議。有球迷指，事前並冇太多人知曉呢個「政府推介嘅盛事」，導致售票情況慘淡。

根據大會數據，是次名宿亞洲巡迴賽香港站，全場只有不足8000人入場，但作賽嘅香港大球場可供4萬人入場觀看，即是場賽事入座率只有不足兩成！若同巡迴賽另兩站「卡塔爾多哈、日本東京」相比，入場數更係三地之中最低嘅，因為多哈站有3萬人入場，而東京站則有4.5萬人入場，氣氛更加熱鬧。

網上唔少人將銷情冷淡歸咎於香港站票價太貴。公開資料顯示，香港「五級票價」由680蚊至2480蚊不等，折算約83.8至305.7歐元；而東京表演賽票價就介乎5500至10萬日圓，折算約33.7至611歐元；而多哈嘅票價介乎100至1000卡塔爾元，折約26.3至263歐元，雖有少數高價飛貴過香港，但平價飛方面就全較香港價廉。

對此就有網民直言，早已坐飛機去日本觀賽，雖然將機票及住宿加埋，費用肯定多於留港觀賽，但勝在可順道旅遊及大食壽司。對外界指本港門飛較貴，主辦單位Legends Assemble就表示，票價需考慮所有必要開支後訂定，望公眾理解。

有到場觀賞呢場「退役球星雲集」嘅表演賽、港府前財政司 曾俊華，並冇大肆評論票價，但就對入座率大有微言。佢在22號於臉書FB上以「盛事變靜事」作標籤表示，一班世界級名宿在球場落力演出，費高、沙維更踢足全場80分鐘。

最終巴塞隆拿傳奇隊以5:2大勝皇家馬德里球星隊，表演場有7球進帳，並有啲幾乎「入籠嘅波」，球迷應該收貨。但與此同時，佢「擡頭望見萬座無人嘅看台」，心情真是「難以言喻」。當大會宣布，入場人數不足8000時，「確實係幾尷尬」。

另外，曾俊華又透露，在同 費高閑談之間，對方曾表示，好鍾意香港，希望可以重溫當年全場滿座嘅盛況，但以入場情況來睇，「似乎就辜負咗佢喇」。