根據澳門本地媒體20號報導，習近平近日親赴澳門三日，期間出席回歸慶典、新政府就職禮、視察本地社會。澳門新聞局早前安排「部分媒體」報名採訪，由特區政府舉辦嘅回歸活動及就職典禮。

至於考察活動方面，未見新聞局有所公佈或安排，成件事如謎一般。至尋日19號終於揭盅，原來考察活動只得《新華社》可以跟隨報道，本地媒體只獲批引用官方媒體嘅消息及資料，以及在某個考察活動完結、習近平離開現場之後，先可訪問相關人士或做花絮。

據《新華社》報道，習近平在尋日上晝分別考察「澳門科技大學」及「橫琴深合區」。然不在場嘅本地媒體，如何以本地人關心嘅角度，報道主席來澳視察嘅「暖心」故事？無數「眼利」市民就質疑，點解本地傳媒用嘅畫面全係《新華社》拍嘅！形同「真空、失蹤」一般。

《新華社》指，習近平除考察科大及橫琴深合區外，亦分別會見特區政府行政、立法、司法機構負責人、本地社會各界代表人士、前特首 何厚鏵及 崔世安、香港特區行政長官 李家超。另外，尋日上晝習近平夫人 彭麗媛在特首 賀一誠夫人 鄭素貞陪同下，赴澳門博物館參訪。然此等活動及會見，只得《新華社》可跟隨報道。