英媒《BBC》在2號報道指，歐洲超巿內售賣標有「意大利產」嘅茄醬，疑參雜使用中國新疆產製嘅茄醬，甚至同新疆「強迫勞動鏈」有關。《BBC》記者暗訪其中一間廠商，發現工廠存放嘅茄膏桶上，印有受制裁嘅新疆公司名，工廠負責人就聲稱「可採用中國蕃茄」。對此，有親歷過「教育營」嘅受訪者回憶，若冇完成每日採收指標就會遭電棒毒打。

《BBC》測試後發現，共17種蕃茄醬可能參有來自中國嘅蕃茄，大部分都係英國或德國超巿嘅「自家品牌」。報道指，大部分中國蕃茄來自新疆，涉及維吾爾族及其他穆斯林少數民族嘅強迫勞動，中共就稱之為「再教育營」。中國政府一直將少數民族視為國安威脅，聯合國曾譴責中共犯下折磨及虐待等罪行，中共就一直否認有強迫人民於蕃茄產業鏈勞動。

報導中有14名被訪者表示，過去16年佢哋曾經「目睹或親歷」新疆蕃茄田內嘅強迫勞動。化名Ahmed嘅經歷人士指，當時獄方就曾經透露，蕃被用於出口，而且如果工人冇完成當日嘅採集指標，例如每日要採足650公斤而工人不達標，該名工人就會遭遇電棒毒打。

報道發現，新疆蕃茄透過貨運列車運至歐洲，路線穿越過「哈薩克斯坦、阿塞拜疆、格魯吉亞」最後被送至意大利。一間名為Antonio Petti 嘅公司反覆出現在貨運資料及收據之中，2020至2023年該公司自一間名為「新疆冠農」嘅公司購入3,600萬公斤嘅蕃茄。Antonio Petti集團向歐洲各地超巿供應蕃茄製品，部分超巿將製品打上自家品牌做販售。

《BBC》檢測在「英美德」三國出售嘅64款茄醬，並同來自「意中」嘅樣本進行比對。發現當中最暢銷嘅意大利品牌及超市自家品牌茄醬，多由Antonio Petti集團所生產。實驗結果顯示，部分產品根本冇意大利蕃茄成分，包括被銷往美國嘅Mutti及Napolina，以及「德英」兩國超市內嘅自家品牌如Sainsbury’s及Marks & Spencer。

根據檢測結果，當中有17件產品含中國蕃茄成分，其中10件就係來自Antonio Petti公司。在調查Antonio Petti集團嘅過程中，記者假扮商人以洽談訂單，在參觀該集團旗下嘅「意大利食品」公司某間廠時，記者問「是否有使用中國蕃茄」，對方隱晦指：係嘅……歐洲冇人想要中國蕃茄。但如果你要都可以，我哋可以搵到一條路為你提供最好嘅價錢，即使係用中國蕃茄。

記者拍攝工廠內十幾個裝有茄膏嘅桶，標籤清晰可見「新疆冠農番茄有限公司」嘅字樣。Antonio Petti集團回覆《BBC》時就堅稱，並冇採購被制裁嘅「新疆冠農」產品，而係自一間叫「巴州紅果商貿有限公司」（Bazhou Red Fruit）公司採購茄膏，並指該公司「冇捲入強迫勞動」。惟經調查後記者又再次發現，呢間公司嘅電話同「新疆冠農」一樣，嘅間公司根本就係「冠農」嘅空殻公司。

報道指出，美國已立法禁止入口新疆產品，歐洲、英國卻採取相對寬鬆嘅姿態，容許企業在供應鏈勞工問題上進行自我監管。人權組織「反奴隸制國際」（Anti-Slavery International）成員Chloe Cranston對此表示，歐洲必須承諾採取更強硬嘅法律立法。並警告稱，寬鬆嘅資態會令英國成為强迫勞動產品嘅「垃圾場」。