根據台灣《中央社》4號報導，中國廣東省 廣州市 增城區1號發生反設立停車站收費嘅「騷亂」，有過千名民眾聚集抗議並打爛收費站，地方政府最終被逼要取消收費。

香港《明報》今日報導指，事件在增城區 新塘鎮 大敦村發生，肇因係大敦村主要出入口，自12月1號起使用車輛進出收費閘機，車位月租方面，細車250、大車350，臨停時租為2蚊。

據報，當地居民認為收費過高，而且之前停在村內嘅車，同被要求要補交停車費，居民於是在收費當日上街抗議。抗議由數百名租戶發起，後有超過千名民眾聚集在村內主幹道，即「新敦大道」及 「大新路」交界十字路口。

事件最終演變成為騷亂，有人打砸新建收費站、圍堵派出所，期間大敦村一帶手機訊號被中斷，疑遭當局介入屏蔽。之後鎮官員出面同示威民眾對話，承諾取消收費並退還收費，人群凌晨先至散去。

報導引述新塘鎮政府宣傳部門職員證實，當地已拆除收費閘機，收費措施僅實施一日。網上資料顯示，大敦村在2011年都曾爆發騷亂，事件起因係當地一名懷孕女攤販，被治安隊員推倒，觸發近萬名外來民工衝擊政府機關並焚燒警車。