根據《自由亞洲電台》28號報導，山東省 濟南市 平陰縣近期以公開招標方式，為當地「低空經濟特許經營權」進行招標，最終以9.24億成交價出讓經營權30年，成為中國地方政府「賣天」或稱「問天借錢」嘅首例。

山東首配合中國政府，大力提倡發展所謂「低空經濟」等政策，親自示範何謂「上有好者，下必甚焉」。但地方政府呢種所謂「賣天」嘅做法，引發各界質疑，會否再次造成各地政府群起效尤。

山東省 濟南市 平陰縣創先河，宣佈以9.24億人民幣嘅成交價，以公開招標方式將平陰縣「低空經濟30年特許經營權」出讓予「山東金宇通用航空有限公司」，消息引發社會關注及討論。

公告中列明，在經營期內該公司可享「低空經濟」嘅運營維護權，包括提供飛行執照、駕駛培訓等服務。據中媒披露，首間擁有中國地方低空經濟特許經營權嘅公司背景，發現該公司是由當地財政局100%持股，使平陰縣「賣天」創舉引起更多質疑。

博主「昊布斯」憂心指，一間啱成立20日嘅公司，註冊資本唯得2個億，就敢使9個幾億「買空氣」。間公司嘅營業執照日同發標書竟係同一日，全資控股股東得一位，就係當地財政局。豈非「左手倒右手」嘅把戲？今日縣府賣「低空權」，明日會否賣空氣呼吸權？諗到都驚。

有網民批，地方政府因房地產不景，無法透過土地買賣賺取收入，利用中央推廣低空經濟概念作為藉口，變成新嘅融資渠道，製造另一個泡沫。有博主就關注指「天空擁有權由誰界定？收費問題諗好未？」。

博主「馮馮聊聊」指：頂上之天都可以賣錢，咁究竟要賣咩呀？房產公司買地，賣出土地開發權，但賣天空，距地1.2萬米以下呢片空間嘅商業開發權。唔通以後用無人機送貨、空中旅遊、低空做廣告？塊餅有幾大，大家諗吓！就問一句，百姓仲可隨便放風箏咩？過鳥係咪要俾過路費？

廣東省交通運輸協會智庫專家 韓濤表示，空域屬國家事權，地方政府冇權為空域進行招標，佢認為平陰縣嘅做法係想將空域圈住。人民網在週四28號報道形容，平陰縣嘅做法為低空經濟在中國邁出嘅「關鍵一步」。因應今次平陰縣「賣天」所引發嘅討論，濟南發展及改革局表示，已成立工作專組處理有關轉讓問題，將集中回應外界關切。