根據台灣《中央社》、《鏡新聞》等台媒27號報導，2024年「世界12強棒球賽」在24號落幕，台灣隊在冠軍戰對戰地主日本隊，雙方在今次賽事3度交手，台灣隊在最終冠軍戰派出王牌左投 林昱珉，並在全隊齊心守備之下，成功壓制日本隊黃金打線，台灣隊終以4:0完封日本隊。

今次係台灣隊睽違32年闖進棒球3大賽冠軍戰，並成功挑戰得到首座世界冠軍，係台灣棒球史上光榮嘅一役，台灣國家隊奪冠後舉國振奮，特別在大概20年前，台灣棒球界曾經歷過一段黑暗時期，因簽賭而衍生嘅打假球事件，重創當年球迷嘅熱情，台灣棒球賽事十年不振。

而今次大賽前，外國球評多睇衰台灣隊實力，全因台灣隊成員並冇「明星級」球員，不過台灣隊隊員發揮韌性，加上情報搜查隊嘅助力，在循環賽擊敗「韓國、美國、古巴」等棒球強國，最終憑實力獲得世界賽冠軍頭銜。而台灣不止成棒奪冠，青少棒亦培育有成。

在近日嘅第11屆U12亞洲少棒錦標賽預賽，台灣隊取得2勝1敗晉級複賽，並在複賽中迎戰中國隊，台灣隊輕鬆在前4局就以16:0嘅大比數，扣倒對手中國隊。報導指出，台灣小將在首局就攻下8分大局，投手持續壓制對方打線。

儘管2局雙方互冇得分，不過3局下台灣打線再次發威，靠一發2分砲以及後續多隻安打，加上對手中國隊投手失準，送出5次保送，單局台灣隊再下8分大局。台灣隊4局僅被敲出1隻安打，最終以16:0扣倒中國奪勝，提前在第4局就結束比賽收工。今28號將迎戰日本隊。

另有報導指，今次台灣隊隊長 陳傑憲在冠軍戰轟出關鍵3分砲，繞壘時在胸前比劃一個框，引發世界球迷熱議，佢解釋稱，存粹係想話俾大家知「我哋係來自台灣嘅選手」。

有關話題引發台灣多個本土社團串連，並指出「台灣就係台灣，台灣自己要開始做起」，除咗高喊「Team Taiwan、挺台灣」，多名成員亦共同比出 陳傑憲嘅跑壘手勢，盼政府推動正名為「台灣」參賽。

「台灣社」前社長 李川信表示，台灣隊奪冠，選手雖係台灣人，但隊服、隊名都仍使用「中華台北」，令人不快，亦對唔住選手嘅表現；未來應集民間之力，在各方面推動用「台灣」之名，向國際爭取正名。

「台灣北社」副社長 羅浚晅指，陳傑憲在跑壘時比出手勢，就係要強調胸前少咗「台灣」嘅名，要話俾全世界知我哋係「台灣隊、台灣人」；台灣曾以「福爾摩沙」之名出戰奧運，直至1981年洛桑協議先改用中華台北之名，但該名並不能代表台灣，應找回真正嘅名，並呼籲「公民、組織、媒體」以台灣描述自身。

「辜寬敏紀念基金會」副董事長 林宜正表示，台灣代表隊奪冠後，台灣不分男女老幼全沈浸在世界冠軍嘅榮耀中，但透過選手嘅表現可知，少咗國家名，選手欠缺「有歸屬」嘅光榮感。林宜正呼籲，望以「台灣」為隊名，參加2026「世界棒球經典賽」（WBC），「政府、棒協、民間」應達成共識，協助選手以台灣之名爭取榮耀。