根據《星島日報》25號報導，黃子華、衛詩雅（Michelle）、朱栢康、韋羅莎及導演 陳茂賢尋日赴尖沙咀「英皇戲院」為電影《破•地獄》謝票，由於該片票房已破9000萬港元，「英皇集團」主席 楊受成博士在尋晚舉行慶功宴，為電影《破•地獄》打氣之餘亦希望該劇能繼續氣勢如虹。

子華目前正閉關綵排舞台劇《香港式離婚》，今次應係佢演前最後一次露面，子華坦言好疲累但好開心。並指並非來謝票，而係來同觀眾講道歉，因為最初上映個心好怯，唔知觀眾能否承受咁認真及人情味咁重嘅戲，所以最初我個訪問夾硬令自己好亢奮，令人感覺輕啲，但發覺觀眾接受力及鑑賞遠超我想像，所以係我睇小觀眾、呃咗觀眾。其實係自己冇信心。

至於第二件要道歉嘅事就係「低估票房」，演員及導演估票房數時，佢估得最低，係輸得最勁嘅，而現時票房較自己想像高一倍，佢笑言因今次教訓，佢唔夠膽估香港票房天花板。至於在港產片票房之冠《毒舌大狀》之後，佢想唔想雄霸香港票房頭一、二位？子華表示，做到就最好，望香港票房冇天花板，最好年年都有人更上層樓。

黃子華表示，今次不止破地獄，更加係破紀錄，亦感到自豪係佢堅持用《破地獄》呢個名，呢個名令電影更有層次。至於票房毒藥變靈藥，子華表示「奇妙」，可以高到你唔信，又可低到你唔信，次次都懷住敬畏之心去做，不可話一定得，但定要搏命做到最好。