根據台灣《中央社》20號報導，中國旅遊景點近日持續出現多種「假問題」，繼深圳第一峰梧桐山一塊大石，早前被人發現係水泥「假石」之後，湖南張家界一旅遊古城，同因被指係「假古城」而乏人問津，致其母公司陷入破產邊緣。

根據香港《明報》當日轉述中媒消息指，位於 張家界嘅「假古城」名為「大庸古城」，由「大庸古城發展有限公司」投資24億人民幣興建，但開業3年乏人問津，至今已變成「鬼城」，每天只售出10餘張票券，甚至未能完成整個項目招商，拖累母公司陷入破產邊緣。

據報，該人造古城始建於2016年，在2021年開始試營運，公司方面原希望可以成為「張家界中心城區嘅城市文化休閒新地標」，但開業以來遊客唔多，今年上半年更只有2300人購票。報導指，由於人流稀少，自開業以來人由稀少，內部商戶更聯合拒交租，指景區未搞好。

有鑑於此，開發呢個「假古城」嘅「大庸古城發展有限公司」，上半年淨虧損逾6438萬元，至今累計虧損已超過5億元。報導指，隨著人民旅遊觀念轉變，人造景區愈來愈不受歡迎。報導引述有關訊息指，當前中國有古鎮、古城共2800座，僅33個屬較好嘅5A級景區，訊息意味著有大量古鎮知名度較低，亦正面臨高度同質化嘅問題。

上個月底，深圳梧桐山山頂一塊大石，被人發現原來係用「磚、泥、鋼筋」假造，消息引來唔少網友譁然不滿，更有人質疑問：類似假嘢「全國仲有幾多？」。當時深圳有關方面聲稱，建假山時已有說明，不存在欺騙。不過有網友批評：現場冇說明標記，外人難以知道內情，並認為山上不該有假嘢。消息打擊咗梧桐山嘅形象。