根據香港《明報》等多間港媒19號報導，香港民主派「47人初選案」在今朝上晝10點在西九裁判法院，對45名被裁定「串謀顛覆國家政權」罪成嘅香港民主派代表判刑。在判決日前晚至19號凌晨，法院外已陸續有市民通宵排隊，至朝早8點，排隊人數已增至300人，包括凌晨5點到場嘅前公民黨區議員、在案中脫罪嘅 李予信。佢期望社會繼續關心庭內牽涉集結自由、言論自由嘅案件，佢認為當中嘅判決及結論值得市民深思未來香港方向。

其中被指為初選組織者嘅 戴耀廷被判囚10年，不認罪經審判裁定有罪嘅 吳政亨同被視為組織者，被判監禁七年三個月。同樣是組織者並轉爲控方證人的區諾軒、趙家賢、鍾錦麟，分別被判囚6年9月、7年、6年1個月。同樣轉為控方證人嘅參與者 林景楠，則被判囚5年2個月。參與者當中，判刑最長嘅係不認罪嘅 鄒家成，被判7年9個月，同係不認罪嘅參與者 何桂藍同被判7年。已認罪嘅 黃之鋒被判囚4年8個月。

報導指出，法院在判刑日設440個公眾席俾公眾人士入庭旁聽，但可以直接見證判刑嘅正庭只有5個位，其他得以進場者則要至延展法庭觀看正庭判刑嘅直播。數百人冒雨在法院外排隊。大批警員在法院外戒備，以及查問排隊人士，其中一名女子因身著黑色印有黃色「香港」字樣嘅衫被警方查問。

《明報》報導指，今朝9點有名市民 趙小姐在法院附近遭警方截查，相信係因佢身著印有獅子山圖樣嘅黑衣，並印有「47」及《聖經》經文「惟願公平如大水滾滾，使公義如江河滔滔」等字樣。趙小姐透露，警方紀錄其個人資料，並要求佢唔好展示有政治標語信息之物品。佢指該設計係為本案而設，並認為涉案人需要有公義嘅審訊。

包括「美英德澳」等多國領使派代表。望能進入法院見證判刑嘅另有多名民主派社運人士。專做法庭新聞嘅網媒《法庭線》訪問等候進入法庭嘅民主黨前主席 劉慧卿，劉對於黨友被關押多時感到憤怒，並表示黨友在 特朗普上屆無法連任時被捕，事隔4年 特朗普已準備再次重返白宮，但被捕者仍被關押，係不合理嘅做法。

前香港公民組織民間人權陣線召集人 陳晧桓表示，因排隊人數太多，即使自己未能進入法庭，亦會堅持留在庭外，象徵與被告同行。佢並指出，今次判決將俾港人及國際社會咩訊息，值得各界反思。

另外，同在清晨於法院外排隊等候旁聽籌、社民連外務副主席 周嘉發表示，冀望盡快同黨友重聚「大家開開心心打個邊爐」。周嘉發在候籌期間，特意帶來逆彌《蓋層紀》及魯迅《阿Q正傳》兩本著作打發時間，佢指《蓋層紀》描寫過去10年間社運，形容內容赤裸真實，「平時都未敢拎出嚟睇，係依啲時候先想咬緊牙關、一口氣睇哂佢」。

排隊候位嘅 何同學表示，而家在外國留學，今次趁放假來支持自己認識嘅「劉穎匡、鄒家成、黃子悅」等被告，佢形容好友「好硬淨、好犀利」，期望到庭支持佢哋。佢指，過往亦有留意所謂「暴動案」，望到場更了解今次案件；100歲嘅大黃伯上周17號已在法院外排隊候籌。寒風下，佢仍要到庭支持眾被告，並認為被告「無做傷害國家嘅事」。