根據《Yahoo新聞》16號報導，著名日本威士忌「響」嘅生產商「SANTORY三得利」在近日對外指出，其高價酒銷量在中國正面臨營銷嘅重大轉折點。「三得利」行政總裁對外表示：過去日本經濟艱難咗幾十年，而家中國就快要步上日本嘅後塵。

近日「三得利」行政總裁 新浪剛史在公司紐約總部，接受《Yahoo財經》廣播podcast 專訪時表示：公司在中國嘅生意正處於轉折點，中國嘅通縮同過去日本經歷過嘅非常相似。關鍵問題係消費者有錢但唔想使，以及預期銷量造成嘅生產過剩。

「三得利」旗下有多支著名酒品，包括著名嘅「響、山崎、白州、知多」等多種等級價位嘅名酒。係全球知名嘅日本威士忌品牌製造商，並曾經在 2014 年以160億美元，收購美國波本威士忌「金賓」（Jim Beam）。

報導指出，日本經濟泡沫在1990年代初爆破，致接下來30幾年嘅通縮時期。極低嘅利率措施，對刺激經濟增長幾乎毫無作用。今年初 新浪剛史在《金融時報》撰寫專欄文章，將呢番掙扎過程喻為「睇唔到嘅怪物」。直至近年日本經濟先因消費改善重新甦醒，日本今年第二季GDP較上季更加增長0.8%。

報導認為，現階段可以肯定嘅就係，中國最近已經感受到經濟緊縮。消費者已經在過去好長一段時間內，減少個人或家庭嘅「消費、借貸」。中國第二季GDP年增長係4.7%，低於預期嘅5.1%。包括Nike、Levi’s等美商公司皆警告，在中國嘅業務正面臨進一步挑戰。

為咗因應有關挑戰，中國近日宣布發行特別債券，推出規模達2萬億人民幣嘅財政刺激措施。刺激計畫將分開兩部份，一半供俾地方政府，以助減輕地方債務，另一半將用於補貼購買家電等生活物品，並為有2個或2個以上子女嘅家庭，提供每名子女800元嘅補貼。

在中國拋出經濟應急措施後，中國股市隨之飆升向上。不過，中國仍需要繼續面對「人口老化、社會保障體係不完善、青年失業率飆高」等重大挑戰。新浪剛史同時指出，政府應鼓勵私人企業「提高風險承受力」及「整體創新發展」。

雖然中國經濟如此，但「三得利」並不打算完全放棄中國。新浪剛史表示，將會續留在中國，直至通脹回升至溫和水平。不過佢亦指出，或在未來10至20年，中國先會重新「上軌道」。新浪剛史又再強調，中國應該建立獎勵企業及個人「提升財務風險機制」，以創造「由私人企業主導」嘅經濟，而非倚賴國有企業來主導。