根據《星島日報》14號報導，台灣過江龍「燈籠滷味」在日前宣佈，銅鑼灣 登龍街分店將不再續約，將在11月結束營運，亦係繼上月中環分店結業後，第二間結業嘅港島分店。餐廳指，該銅鑼灣分店係「燈籠滷味」在香港嘅起點，至今已營運近5年，但面對百業蕭條嘅挑戰，需要作出更明智嘅決定，決定忍痛告別，留下「彈藥」未來再戰。

「燈籠滷味」來自台北師大夜市，當年開業嘅小攤檔冇掛上任何招牌，只掛有兩個燈籠，除方便照明外，亦當作攤位明顯地標，久而久之「燈籠滷味」自然成為招牌。報道指，「燈籠滷味（香港）」由80後土生港人Dominic引入港，於2020年正式登陸香港，在銅鑼灣開設海外第一間分店，以台式秘製滷汁聞名。

「燈籠滷味」指，5年來見證香港許多變遷，眼睇街道無數食店轉換，有幸留下足跡屹立5年。更有客聞訊後笑著講，「燈籠」已成為登龍街老店之一。在咁樣嘅市道之下，看似無奈但亦感到無比驕傲。面對百業蕭條挑戰，我哋需作出更明智決定「忍痛告別」，留下彈藥未來再戰。今日雖暫別，但仍望港人繼續支持登龍街其他苦撐嘅店舖。

「燈籠滷味」中環分店在上月結業後，連同即將結業嘅 銅鑼灣分店，在香港嘅分店將餘下3間，包括「九龍灣、旺角、葵芳」。網民對又一食肆結業感到不捨。有網民稱：整條登龍街都凋零；疫情期間反而日日排長龍，而家啲人北上搵食，見到都心酸。亦有網民指，食物質素大不如前，由銅鑼灣食到朗豪坊，見證著食材質素倒退。