根據台灣《中央社》7號報導，台灣總統 賴清德在5號台灣國慶晚會發表「祖國說」，有關言論引發台灣民眾熱議及外媒關注，在中國網上亦受到中國人廣泛討論。有微博帳號貼出台灣賴總統相關談話影片，並聲稱中華民國「在1949年已滅亡」，即使言論唱和中共官方言論，留言區亦有人隨之附和，但隨即就被網管刪除，僅存在不足1個鐘。

台灣 賴清德總統在5號出席「中華民國113年國慶晚會」時表示，鄰居中華人民共和國10月1日啱先過完75歲生日，再過幾日中華民國就要過113歲生日。因此就年紀來講，中華人民共和國絕冇可能成為「『中華民國』人民」嘅「祖國」，相反係中華民國可能係中華人民共和國75歲以上民眾嘅「祖國」。

賴總統並指出，由於中華民國「在台澎金馬落地生根已經75年」，不必再去談論呢一層關係。但是如果有人要祝賀中華人民共和國生日快樂，特別係祝賀詞要精準，切勿用「祖國」兩字。上述講法在5號被歐美媒體大量報導，而中國至今都未有最新回應，外界戲稱：賴清德此番講話超出北京思考模式。

綜合中國網上訊息及《美國之音》（VOA）中文網報導，賴總統5號晚間提出「祖國論」後冇幾耐，中國幾個網路社群就開始陸續轉載台媒嘅文字報導，當時即有中國網友稱：賴又發高論了。亦有人稱：上回講俄羅斯仲未夠，今次又來講祖國。有網友唱和中共中央指：賴清德係台獨無誤。

一個擁有110萬粉絲、主張武統台灣嘅微博帳號「武力統一」，在當日就上傳台灣 賴總統「祖國論」嘅相關影音畫面，並加註「中華民國係中華人民共和國嘅前朝，中華民國於1949年滅亡」等語，引發無數立場愛國嘅粉紅附和，下方留言依然係：支持武統、等什麼出兵吧、台獨就要打、徹底滅了等詞語。

不過呢段台灣 賴總統「祖國論」嘅影音畫面，在上傳不足10分鐘就被刪除。之後該帳號管理者又多次修改內文，但都一樣被網管刪除，畫面最終未能再上傳，在中國網上生存不足1個鐘。第二日6號，中國網上寫手開始發文評論 賴清德嘅「祖國論」，留言區觀點大致相同，更多係對 賴清德嘅一番臭罵。

直至7號止，中國官方包括中共國台辦在內等涉台事務單位，以及中共外交部等涉外單位，都未有對台灣 賴總統嘅「祖國論」作出回應。不過有網民發現，相較於中國牆內網友嘅批評謾罵，海外華人對 賴總統嘅「祖國論」評價就截然不同，對於歷史更明白嘅華人認為，賴清德更偏重於歷史既存事實，反意外令台灣內部「藍白營」紅統派現行。

海外華人網友亦有立場親中者，並附和上述所謂「台獨分裂、歷史悖論」嘅立場，但更多人認為，賴總統講嘅係客觀事實，中華民國歷史確實比中華人民共和國更長久，更何況中華民國依然存在；亦有人表示，賴總統近來接連針對「中俄領土問題」及「誰是祖國」做發言，句句「打在中共要害上」表現令人激賞。

《自由亞洲電台》7號報導指，賴清德在今年9月1號受《年代新聞》電視台專訪時首提「台灣就是中華民國」，並大膽指出，中國若要維護領土主權，應收回被俄國佔領嘅土地，駁斥中國指「收回台灣係維護領土主權」嘅論述。言論雖引起國際關注，但中共堅持不作回應，同今次「祖國論」如出一徹。

「南華大學」亞太研究所所長 孫國祥表示，賴清德講話中強調中華民國嘅正統性，暗示兩者「不存在從屬關係」。孫國祥認為，以往民進黨多次否認中華民國存在，被稱為「披著中華民國外衣」嘅台獨。但 賴清德此番講話清楚表明，民進黨政府已將中華民國視為現今台灣嘅正式國號，並否認中華人民共和國係台灣人民嘅祖國，再一次證明「中華民國在台灣」嘅觀點。

孫國祥稱，國台辦至今冇回應，就係因為 賴清德幾次講話，根本上已超出北京嘅固定反擊模式。孫國祥續指，賴清德嘅言論在策略上，劃清「中華民國」及「中華人民共和國」嘅界線，同過去民進黨「台獨」論述唔同。呢種新表述令北京難以套用以往嘅回應策略，因為佢既唔講台獨，亦唔認「一國兩制」，當然「九二共識」就不存在，已非中共可以思考嘅套路，即係唔知點樣接招。

孫國祥表示，國民黨在台灣雖然將中華民國視為神主牌，但在同北京交流時，卻任由對岸單邊表述，而次次都見唔到中華民國，賴清德此舉行咗一步好棋，借此將國民黨一軍，在台灣公開施壓「藍營」，逼國民黨、民眾黨等親中黨派，在未來同中國大陸互動時，必須拿出佢哋珍藏已久嘅神主牌「中華民國」。