《法廣》在今日8號報導指，中國經濟深陷「房地產危機」及「消費不振」嘅困境，在中共中央推出一系列振興措施十日後，中國政府再次推出新一輪經濟振興計畫。不過有學者認為，中國若冇進行深層經濟改革，今次中央救市丟出來嘅錢將會曇花一現，對人民來講最終都係海市蜃樓「睇得到食唔到」。

根據官方通知，國務院新聞辦公室應會在8號上晝十點舉行新聞發布會，再次宣布新一系列嘅經濟舉措。世界第二大經濟體將經濟年增長率訂在5%左右，但多名經濟學家認為中國高層過於樂觀，因為中國經濟在3年疫情後，始終未有真正復蘇。

報導指出，中國「最高層」一直不願承認國家經濟陷入危機，數個月以來，當局僅公布部分零星但又幾乎無效嘅舉措。不過至9月底，當局突然之間大轉向，公布一系列多年來罕見嘅規模措施，包括「降息、降准、降房貸」等較實質嘅措施。

有分析師形容，今次措施係「火箭筒式刺激 」，有關嘅一攬子措施帶動「港中」股市飆升 20% 以上，而官方估計將在週二發佈更強勁嘅計畫。中國發改委主任 鄭柵潔估計將會在發布會上宣布，系統落實一攬子增量政策，紮實推動經濟向上、結構向優等發展政策。

「摩根士丹利」預計，中國好快會再宣布2萬億人民幣財政刺激方案，首批就可能在10月8號發改委會上宣布。該刺激方案有一半同化解債務有關，一半同維持地方政府開支有關，特別係同基礎建設投資及消費品方面等有關。

「瑞銀」在周一公布報告，預計中國短期內將推出重大財政刺激措施。該行首席中國經濟學家 汪濤 指，財政刺激取決於中國政府要達成咩目標，如果僅為達成今年增長5%嘅目標，實施「以支出為中心」嘅刺激措施，就需要1.5萬億至2萬億。

但如果要在未來幾季「穩定房產市場」，抵消房地產低迷嘅長期拖累，扭轉整體價格及「企業、消費者」信心嘅螺旋式下降，使得未來2年嘅經濟增長接近有5%，就會需要大幅增加刺激措施，以及額外嘅結構性改革。

有預測指，發改委嘅增量項目可能會達到3至5萬億人民幣之間，但其實今年地方嘅財政缺口數已超過10萬億。《華爾街日報》引述消息指，即使市場對中國將採取咩措施支持經濟增長「存在多種猜測」，亦確實有經濟措施醞釀中，但規模可能冇大家估嘅咁大。

《法新社》引述分析指，普遍預計當局將進一步採取財政支持措施，例如發行大型債券或支持家庭消費等政策，但就警告指，中國經濟體制需進行「更深遠嘅改革」，減少房地產方面嘅負債，以及促進市民消費，消除經濟增長嘅主要障礙。

法國「外貿銀行」亞太區首席經濟學家Alicia Garcia Herrero預測指，除非中國透過改革「失業救濟金、養老金」等結構性政策來刺激消費，否則唔會有咩重大變化。如果中國經濟嘅根本問題未真正解決，大家預期嘅股市大漲，最終可能只會係「海市蜃樓」。

假如上述措施最終都被證實無效，情況將會更加嚴重，因為這意味著，即使中國推出一系列經濟振興措施，在市場上亦冇產生作用。在香港，恆生指數周一上漲 1.6%，而上海、深圳證券交易所因中國十一公眾假期休市。

不過，今日8號最新消息指出，中國股市在長假後再開，開盤即爆衝大漲10%，而連日升勢嘅港股就略顯疲態，恆指今朝低開250點，盤中一度大瀉2336點跌幅達10.12%，創下16年來嘅當日最大跌幅。恆指再次失守23000並跌破21000點，其後略升並在21300點徘徊。