根據《自由亞洲電台》10月1號報導，在中華人民共和國75周年國慶之際，香港特區政府在當日舉行升旗禮及酒會，行政長官 李家超在酒會致辭時，引用唐末詩僧 尚顏 嘅《送朴山人歸新羅》當中詩句「浩渺行無極，揚帆但信風」，寄語香港要乘著中共二十屆三中全會東風推進改革，同國家「共進步、共繁榮」，為中國式現代化強國建設、民族復興偉業作出新一輪更大貢獻。

中國國家主席 習近平在2013年印尼峇里舉行嘅「亞太經合組織」工商領導人峰會演講，以及在2014年中華人民共和國成立65周年招待會上講話，都曾引用同一詩句。五言律詩《送朴山人歸新羅》係 尚顏 撰寫要贈送朝鮮好友，其中一句「浩渺行無極，揚帆但信風」意指在廣闊無垠嘅大海中冇盡頭，揚起帆向著目的地御風而行，喻意未來好運勢，前景正明。

國慶酒會在會展舉行，李家超表示，今年係完成《基本法》第23條本地立法嘅憲制責任及歷史使命，亦係香港完善地區治理，重塑區議會後嘅第一個國慶日，別具歷史意義。李家超重申，特區政府會繼續以維護國家主權、安全、發展利益為最高原則，弘揚以「愛國愛港」為核心、同「一國兩制」方針相適應嘅主流價值觀，團結社會各界，將「愛國愛港」熱情轉化為實際行動，齊心協力推動香港實現「由治及興」。

李家超又表示，在中國發展嘅路上，香港一直係參與者、貢獻者、受益者，香港嘅發展離唔開國家，香港要繼續主動融入國家發展大局，當好國內國際雙循環嘅「超級聯繫人、超級增值人」，全面提升國際競爭力，繼續強化自身優勢，抓緊發展機遇，令一個個「金字招牌」更加閃亮。

港府當日上晝在灣仔金紫荊廣場舉行升旗儀式，由「皇仁書院、庇理羅士女子中學」合唱團領唱國歌，飛行服務隊直升機在上空向國旗及區旗行注目禮，消防船射水致敬；特區政府高層官員、行政會議成員、中聯辦主 鄭雁雄，以及3位前特首 梁振英、曾蔭權、林鄭月娥均有出席，唯首任特首 董建華連4年缺席，據悉 董建華在家休養。

另外，香港警務處處長 蕭澤頤亦對外表示，在國慶節當日，全港唔同地方都有調配人手，約部署7000警力戒備，望市民在國慶呢個「大日子」能夠「開心、快樂、家庭幸福」。根據當地媒體報導畫面，十一假期首日，香港各地都有大批警察佈防，可見港警對國安法幾冇信心。

而李家超話語之間不離「國家」，將「香港人」身份徹底抹去，有網民就表示，即使港府大搞特搞慶祝活動，但在國安法之下國慶早已無慶祝氣氛。特首深度綑綁國家，都被指幾有「卸膊」之意，意圖將今時今日嘅經濟環境「甩鍋」俾親自指揮嘅 習主席，而佢只需要繼續扮演忠臣，將中央交辦嘅「政治行動」徹底落實，徹底抹去香港嘅特殊性，保證香港再無第二個聲音即可。