根據台灣《中央社》22號報導，在中國政府號召「過緊日子」之際，兩名知情人士向《路透社》透露，中國「民生銀行」北京分行員工正在被減薪，最高減幅達50%。

《路透社》在20號發布來自北京嘅報導指，「民生銀行」除咗減薪，另外一並停止支付北京分行部分工作相關費用及員工其他福利。北京分行係「民生銀行」最大嘅分行，員工有超過4000人。

兩名匿名知情人士表示，有關措施已經在北京分行全面實施，但暫時未不清楚「民生銀行」是否會在其他分行採取相同措施。今次降薪降幅最高達50%，係近年來中國大型商業銀行降薪幅度最大嘅一次。

中國銀行業監管機構「國家金融監督管理局」暫未做出回應。但根據《BBC中文》報導，中國經濟持續放緩復甦無力，官方在舊年釋出「過緊日子」嘅口號，以緩解財政收入捉襟見肘嘅困局；各地政府隨即響應號召，各級公務員首當其衝，自舊年起陸續降薪。

與此同時，中國金融機構並已實施多項措施，包括「削減薪酬、獎金」，並對員工下「禁奢令」，禁止穿著昂貴服飾返工。《路透社》7月曾報導指，中國四大銀行之一嘅「建設銀行」，已要求其總部員工至少要減薪10%。

《路透社》在9月早前曾披露，10大基金經理公司之一嘅中國招商基金管理公司，要求其高級管理人員「退返過去5年」超過新上限嘅薪金。「民生銀行」減薪再次反映出銀行對公司盈利能力嘅擔憂。

中國經濟陷入房地產危機，並正在步向通縮，中國嘅貸款機構面臨降低貸款成本嘅壓力。官方數據顯示，截至6月底，中國銀行嘅淨利息利差為1.54%，創歷史新低。

「民生銀行」成立於1996年，係中國第一間私營控股商業銀行，中國持續蔓延嘅房地產危機，使其營運前景遭遇重創。截至舊年底，「民生銀行」總資產為7.7萬億元，在中國4600幾間銀行中排名第11。

「民生銀行」係中國「恆大集團」嘅主要債權人，而「恆大集團」就係中國房地產行業風暴嘅最核心。今年上半年，「民生銀行」嘅淨利潤年減5.5%；房地產不良貸款比率在今年上半年為5.29%，高於舊年嘅4.92%。