根據台灣《中央社》17號報導，在中國文革期間擔任紅衛兵領袖嘅 宋彬彬，傳出16號在美國居所離世，享年77歲。宋彬彬曾經在文革期間，因為替時任領導 毛澤東戴上繡有「紅衛兵」三字嘅繡章而聞名；晚年佢曾經對自己中學副校長 卞仲耘之死，公開表示懺悔，事件引起社會爭論。

推特Ｘ在16號當日出現 宋彬彬離世嘅消息。宋彬彬嘅父親 宋任窮曾經在中國前領導 毛澤東、鄧小平手下擔任要職，同 宋彬彬一樣有相關背景嘅人，都會被視為共產黨高幹嘅「紅二代」。在文革期間，宋彬彬就讀北京師範大學女附中，並成為紅衛兵領袖。

宋女在當時響應文革運動，1966年6月2號佢率先在校內貼出大字報，並攻擊校方高層，帶動北師大女附中嘅文革行動。時任該校黨總支書記兼副校長 卞仲耘，在學生發起嘅遊行及批鬥中，被毆打折磨致死，卞仲耘亦成為在紅衛兵運動中，第一個被打死嘅教育工作者。

以「暴力」為主嘅文革運動帷幕開啟後，令 宋女揚名於外嘅事件，就係1966年毛澤東在天安門城樓接見紅衛兵，宋女為毛戴上繡有「紅衛兵」三字嘅繡章，毛澤東並問其名，宋女答：宋彬彬。毛又問係咪文質彬彬嘅彬？宋女答：係。毛又回：要武嘛。宋女於是改名 宋要武。

《光明日報》在當年8月發表署名 宋要武嘅文章「我給毛主席戴上紅袖章」。該文隨後被《人民日報》轉載，文稱：當日係我終生難忘嘅一日。我為毛主席戴上紅衛兵袖章，主席又為我取一個「有偉大意義」嘅名。毛主席為我哋指明了方向，我哋要起來造反、要武啦！

自此之後，宋彬彬就成為紅衛兵運動「暴力、混亂」嘅象徵符號，毛澤東接見紅衛兵嘅舉措，並且對 宋彬彬講出「要武」，就係要透過公開場合，像紅衛兵傳遞「支持暴力運動」嘅政治訊號。

不過，宋彬彬所代表嘅紅衛兵好快就失勢，1969年佢被派往內蒙古自治區錫林郭勒盟牧區，之後參加插隊、上山下鄉。1972年，佢進入長春地質學院成為工農兵學員，在1975年畢業。1980年 宋女以留學名義移民美國。並再次改名叫 宋岩。

宋彬彬再次進入公眾視野，係因2014年佢同其他紅衛兵，在當年被批鬥致死嘅北師大女附中副校長 卞仲耘嘅半身像前鞠躬，眾人並公開表示懺悔及道歉。現時網上仍可搵到 宋女嘅道歉全文。

宋女表示：請允我表達對 卞校長嘅永久悼念及歉意，沒有保護好校領導，係終生嘅傷痛及懊悔。宋女稱：文革係一場大災難，一個國家走向點樣嘅未來，好大程度上取決於如何面對自己嘅過去。我希望所有在文革中做過錯事、傷害過老師同學嘅人，都能直面自己、反思文革、求得原諒、達成和解。

宋女嘅道歉文隨即引起關注。有人對此表示接納，不過有更多人認為道歉來得太遲，懺悔引起無數爭論及質疑。卞仲耘丈夫 王晶垚對其道歉就強調，在真相大白之前「不接受虛偽道歉」。王晶垚在2021年8月29號過世，終究未能等到殺妻兇手被嚴懲，抱憾離世。

根據中國官方估計，1966年8至9月間，北京有近1800人在遭受紅衛兵及其有關之激進人士嘅攻擊後死亡。至今，文革在中國仍然係未能言明嘅禁區。