根據《自由亞洲電台》10號報導，澳門第6任行政長官選舉提名期將在周四12號結束，澳門終審法院前院長 岑浩輝在周二10號報名參選，並向選管會遞交383張提名表，約佔400名選委總數96%，換言之，其他人已無法取得至少66張提名表，達到「入閘」門檻。

意味著，若無其他意外發生，岑浩輝已經注定係下一屆澳門行政長官，亦係第一個「非澳門土生土長」嘅特首。前澳門媒體人認為，今次由一名被形容為「中共南下幹部」嘅人掌澳，反映出中央不滿意過去幾任特首嘅工作能力，相同情況若發生在香港，不足為奇。

週二10號當日，岑浩輝在代理人 李煥江及競選辦公室正、副主任 葉兆佳、陳家良等人陪同下，赴行政長官選舉辦事處遞交提名表。岑浩輝表示，自己並無預設目標，對於今次所獲得嘅提名數感到滿意，並將繼續爭取餘下17名選委，在下月13號選舉當日「一致通過」。

回顧澳門主權移交後嘅歷屆行政長官選舉，除咗首屆行政長官選舉有2名參選人競逐，其餘4屆均係一人獨選。在上一屆澳門行政長官選舉，賀一誠取得379張提名，約佔選委總數92%；再上屆 崔世安在2014年爭取連任時，就只獲得331張提名，約佔選委總數82%。岑浩輝 初試啼聲就獲得383張提名，佔選委總數96%，堪稱歷年之最。

英國港僑協會董事、澳門《愛瞞日報》前社長Jason Chao在受訪時表示，對今屆同樣只有一人「入閘」，佢並不感到意外。Jason認為，其實全過程都只不過係一個表忠儀式，表忠成分多於實際上任何競爭意義嘅選舉，所以，嗰400名選委無論點選，啲選委去投票，都只不過係一場「政治表演秀」。

今屆澳門特首選舉不同以往，首次由「非土生」澳門居民擔任，岑浩輝係中國 中山出生、並非澳門土生土長。過去曾經在廣州當過律師，在1986年先移居至澳門，自1999年起出任澳門終審法院院長，更被形容為「中共南下幹部」，有「十三太保」或「十三金剛」之稱。

Jason認為，中央以「南下幹部」接手澳門，反映對歷屆澳門官員能力嘅不滿，中央擔心澳門當地官員嘅能力多過其忠誠。在澳門官場、社團中，「忠誠廢物」有一堆，用完咁多件忠誠廢物後，都冇一件可以做到中央期望嘅事，而家搵人咁係要搵一個在政治上、能力上都符合期待嘅人。

Jason所謂嘅「能力不足」，意指過去幾任行政長官，都未能緊貼中央經濟「適度多元化」嘅主調，依然就著利益及其他原因，繼續依賴博彩業。Jason稱，澳門一直在度「食緊老本」，依賴賭業呢條「水喉」，長期都冇咩進步。

Jason續指，在近期賭牌續期後，澳門的確舉辦更多節目，但其核心依然離唔開賭業。在幾年之前，中共對成件事更加清晰，知道賭業全部係吸緊中國嘅血，而呢個大吸血管將資金全部流去「美資」度。阿爺過去當然知道，但為咗扮嘢吸引美資投資中國，一直就冇講得咁明，而家發現賭業嘅可延續出現危機，先大動作要全面發展。

近年港府積極「換血」，以「補充勞工計劃」及「高才通」等途徑全方位引入「新香港人」。Jason認為「今日澳門、明日香港」，將來香港出現一位「新香港人」做特首絕非奇事，關鍵就係要睇香港出身嘅行政長官，能否妥善執行中共旨意。

如果就咁睇 李家超，佢是否完整咁執行中共嘅指示，外界睇來應係「過無不及」執行得唔錯。但具體上中央是否滿意，就唔知囉。但如果到一個點，中共認為 李家超嘅執行力唔夠「到位」，可能就會搵一件「新香港人」，即指定高才通「換血」嘅人物來做特首，都不奇怪。