根據《法廣》5號報導，針對近日驚動台灣社會嘅 柯文哲「京華城圖利案」，在檢方一次收押不成提出抗告後，法院最終以「明知故犯」為由，批准羈押涉案疑犯 柯文哲。隨著 柯 被上銬、入住台北看守所嘅畫面傳遍各大傳媒，柯文哲嘅所謂「十年新政」，如今睇來令各界皆不勝唏噓。

柯文哲涉及圖利財團嘅事件被曝光揭發後，瞬間激起台灣社會唔少漣漪。有評論指，十年前2014年9月5號，柯文哲以「政治新秀」之姿，登記參選台北市長，並在當年獲得「綠營」助推，以得票率57%，總票數85萬票高票當選。隨後十年佢又經歷2018年市長連任選舉、2019年民眾黨創黨，並在今年代表民眾黨，首次投入台灣總統競選。

依其個人意志所創立嘅民眾黨，雖為新興政黨，加上以「白色力量」為號召，霎時之間吸引無數「小草」支持者加入參與政治，但因凡事都由 柯經手，亦頻遭外界批為「一人政黨」，不利政黨健全發展。究竟 柯文哲在過去做咗啲乜嘢？即使在今年總統大選得到369萬票支持，仍然在台灣社會引起「毀譽參半」嘅無限討論。

台灣《上報》專欄作者 陳嘉宏評價指，過去台灣司法經常令外界難以理解，就好似時任副市長 彭振聲，雖然只主持過幾場會議，就突然成為案中「上層關鍵角色」，並被認為「對犯罪事實應知甚詳」，與同案共犯或有「互相配合為不實陳述」之動機及可能，而必須被羈押。

柯 曾講過：貪污來自縱容，長官冇可能唔知情、蓋章就係要負責。而即使其前下屬指證歷歷、即使在其選舉帳目中，出現咁多難以解釋嘅洗錢跡證，甚至有多次出入金主業者家中，把酒言歡、高歌同歡，法官仲相信佢「咩都唔知道」並將其「飭回」，確實超出各界認知界線。

陳嘉宏在4號嘅專欄中，「細數」那些只有 柯文哲「敢做、敢講」嘅敗跡劣行。陳嘉宏表示：有人話，法官將 柯無保請回，民眾黨聲勢將「觸底反彈」，柯 亦將「滿血回歸」。即使唔理 柯 會否被羈押，有關說法明顯忽略過去月內，有關 柯 被揭露嘅「離譜污糟事」，對其個人及其黨會造成幾大殺傷力。

佢指出，在檢方提出抗告，法院二次羈押裁定前，好值得同大家重新檢視嗰啲「放眼台灣政壇」，只有 柯文哲敢做嘅敗跡劣行：

第一、柯 係第一個用總統選票補助款，買私人樓房嘅政客：一般公職嘅選票補助款，依《選罷法》將彙入個人帳戶，但總統選票補助款就會依《總統副總統選罷法》彙入政黨帳戶。因其金額動輒上億，而總統選舉係全黨總動員，選票補助款本應用於彌補虧損或挹注黨費。

過去台灣已選過8次總統，柯文哲係第一個將上億總統選票補助款嘅三分之二，共7千幾萬彙入其私人帳戶，仲用來買房嘅總統候選人。過去冇任何一個總統候選人夠膽咁做，唯獨號稱自己係「新政治」嘅 柯文哲咁樣搞；淨係呢一點，就可以令 柯文哲貪婪現形、無地自容。

第二、柯 係第一個將私人公司設在黨部樓下，專門從事洗錢嘅政客：目前已證明，其「木可公司」已透過各種名目，向競選總部收受4千幾萬政治獻金，而「木可」亦至少有4百萬彙入 柯 私人帳戶。

若非被揭發，4千幾萬政治獻金全歸 柯所有，只不過係遲早嘅事。其黨內有關捐款，多來自最底層嘅「小草」，涓滴成流而來嘅辛苦錢，竟被 柯 透過洗錢手段，轉入個人帳戶，實已刷新台灣政治三觀。

第三、柯 係第一個黨政左右手同時都出事嘅政客：彭振聲係 柯 在政務系統中，最重用嘅政務官，如今涉貪被囚禁在看守所；李文宗係 柯 黨務系統中最關鍵心腹，結果慘遭 柯 切割，並被戴上電子腳鐐。

端木正應係操守專業無虞嘅總稽核，卻涉嫌假帳疑雲朝不保夕。可以話民眾黨係一個「由核心就已腐爛」嘅政治小圈圈，上述人等嘅共同交集就係 柯。而咁樣無知又無能嘅政客，點樣重拾社會對佢嘅信任？

第四、柯 係史上首見「咩都唔知」嘅政客：在其台北市長任內，發生圖利私人公司數百億嘅乾坤大挪移事件，佢竟稱「我不知道」；而凡事必須親簽嘅政治獻金申報資料，今年四月就已被監察院退回，佢同樣話「我不知道」。

「木可公司」彙400萬至其私人帳戶，佢依然堅稱「我不知道」；民眾黨彙入選票補助款三分之二共7千幾萬俾佢，佢都係稱「我不知道」。柯 曾經鬧其前任市長 郝龍斌話：你乜都唔知，點解唔去死一死？陳嘉宏在文中戲問：柯文哲係咪要講下自己應該要「死」幾次？

作為《上報》總主筆，陳嘉宏稱，台灣司法有冇刻意要迫害或輕縱任何政客？非今次討論嘅範圍。但淨係以上4件事，有任何一件發生在任何一名政治人物或政黨身上，都已足以令該政客及其所屬政黨信任度崩塌、社會性死亡。

如今，柯文哲及其黨內重要立委 黃國昌，加上其政黨之下「白營」信徒，不但毫無悔意，仲夠膽誇大言辭、信口雌黃，宣稱民眾黨被「新黨國」所迫害，其毫無政治道德及羞恥心嘅程度，令人咋舌。

根據最新消息，台灣北檢在4號晚提出抗告成功，獲高院撤銷原裁定並發回台北地院更裁。北院在5號傍晚裁定，判 柯文哲羈押禁見，消息一出，各界反應不一。國民黨隨即發布聲明，盼司法依據事實判案。民進黨亦發布聲明，指尊重司法、哀矜勿喜。

現時長居台灣、前日本《產經新聞》台灣支局長 矢板明夫分析，北院嘅決定意味著，在台灣政壇上演10幾年嘅「柯文哲劇場」落幕，但民眾黨內部多人皆曾受民進黨禮讓，累積唔少政治資本，而今時今日嘅行事作為，同「綠營」幾乎完全相反，當年「綠營」識人不明，形成今日亂源，民進黨「難辭其咎」。