根據網媒《橙報》25號報導,巴黎奧運會足球項目已提前拉開戰幕,香港時間尋晚舉行嘅男足分組賽B組首輪阿根廷對上摩洛哥,阿根廷於補時末段一度追和,之後賽事因有球迷衝落球場,一度暫停近兩小時,其後經VAR核實入球無效,阿根廷「由和變輸」。香港賽馬會被指,一度以為賽事以2:2和局收場而派彩,但其後修正賽果,將相關嘅彩金收回。
當時賽事進入末段,阿根廷仍落後1:2,在第16分鐘嘅「超長補時」中,阿根廷球員 梅迪拿入球追平2:2,有球迷衝進球場及投擲雜物,場面十分混亂,球證叫停賽事,球員返更衣室等待。當時外界以為賽事就此完結。就連國際奧委會官網亦顯示賽事以2:2完場。惟球賽暫停約2小時後恢復進行,經VAR核實之後,發現阿根廷有球員越位在先,入球無效。結果補賽又進行3分鐘便完場,阿根廷負1:2。
由於外界一度以為賽事以2:2完場,香港賽馬會疑已派發相關賽事彩金。至比賽結果更正後,馬會先重新按照摩洛哥2:1勝出嘅比數派彩,至於相關「誤派」嘅款項會收回。馬會方面暫時未有最新回應。不過,由於部分馬會投注戶口用戶,已經在收到彩金後將有關款項使清,部分戶口出現結餘「負數」等情況。在連登討論區,有網民展示戶口結餘負1000嘅截圖,疑同事件有關。
理論上,用戶要向戶口存入款項,即可繼續投注其他項目,若用戶不再使用該戶口,就會繼續「欠馬會錢」。商台節目《在晴朗的一天出發》中,主持稱收到聽眾報料,戶口負數達六位數,數額頗為驚人。
中國律師 陸偉雄稱,馬會在咁嘅情況下絕對有權向相關「負數戶口」持有人追討款項。佢稱:馬會在事件上並無法律過失,起因係第三方誤報消息,致其錯派彩俾投注者,係一場誤會。收到錯派彩嘅人士,應歸還款項,若意圖不歸還,有機會干犯盜竊罪。