根據港府最新法例，首階段管制「即棄塑膠餐具及產品」將在今日22號正式生效實施。根據有關報導，新法設有6個月「適應期」，環保署將走訪全港二萬間中小型食肆，以及二萬間零售店及酒店賓館，了解運作情況並做宣傳教育，協助業界符合新法例規定。

環保署建議商戶，適應期內應盡快用完「受規管產品」之存貨，並盡早預備「合適替代品」，並表示「適應期」期間環保署不會執法。不過針對政府在世界地球日推行所謂「環保救地球」嘅「膠製餐具管制」，有部分已轉用環保餐具之商家反應「使用艱難」，有用過紙餐具嘅市民反應「差過膠叉」。

根據香港網媒《U Lifestyle》旗下《U Food》報導，香港政府大力推動「減塑紙餐具」，紙刀叉、紙杯蓋等「環保餐具慘品」陸續出曬來，包括「大快活、譚仔、大家樂、麥當勞、美心MX、shh Café、IKEA、KFC、道地」等餐廳，為配合政府環保政策，已改用環保物料之餐具。

不過唔少民眾在網上PO文發表使用心得，稱紙餐具干擾用餐。有網民發表意見指：各位試過某餐廳隻匙羹未？食飯好似食緊紙皮咁！有人話：俾把木刀你鋸扒！神經病！有人批飲管變紙筒：膠飲管轉紙飲筒，直頭飲唔到！即時漏氣！亦有人稱：食物隊入口嗰下，以為自己食緊報紙！

有人批政府反智並話：諗嗰個有冇親身用過！定佢鐘意食報紙！有人鬧紙杯蓋話：試咗一啖連蓋飲，X佢個紙蓋仲殘留咗啲消毒酒精味！有人批紙餐具：紙叉勁弱智！食新地杯兩次，兩次都俾杯雪糕溶X咗，最後一次用七隻叉疊埋先解決到。

政府以環保之名，卻忽略紙產品嘅使用感受，有人對此表示：感到自己正常食飯嘅權益被剝奪！有市民大力反對環保政策稱：假環保！真cap水！環保X真係好多事！依家餐餐都要自備膠飲管、膠叉、膠匙！菜到就即時掉X哂啲廢木餐具！

有人讚政策稱，響應環保應係件好事，但改進空間仲好大。並指出，食客怨聲四起，影響進食嘅問題關鍵，其實就在環保餐具嘅用料。有唔少人指，市售環保紙餐具有陣怪味，市民稱：嗰隻垃圾再造紙，會有陣怪味同埋會溶。紙杯蓋有怪臭味，直頭飲唔落口、好嘔心。木餐具問題都唔少，木羹匹唔到湯、木叉吉唔到菜、木刀切唔到肉。

香港餐飲聯業協會會長 黃家和在近日受訪，針對紙盒「易腍」、外賣運送容易「走湯水」等問題表示，商家應「小心慎選」包裝材料，並稱如果紙餐具製造技術差就容易軟腍。佢表示部分市售紙餐具有塗層，商家可選用但價錢較高，相關成本恐會因此轉嫁俾市民，市民可能為此要支付額外費用，佢建議各位市民，要習慣性自備餐具！正可謂：大家忍忍都係為咗「愛地球」啫！