中國最驚嘅日本人!垂秀夫「吐真言」 任內遭遇「監聽、跟蹤、威脅」 習近平「判若兩人」禮義廉恥盡失!
中國最驚嘅日本人!垂秀夫「吐真言」 任內遭遇「監聽、跟蹤、威脅」 習近平「判若兩人」禮義廉恥盡失!

根據台灣《中央社》18號報導,前日本駐中國大使 垂秀夫在日前接受日本「文藝春秋」雜誌訪問並發表回憶錄,垂秀夫直言在擔任大使期間,曾多次受到中方「失禮對待」,並話習近平在就任中共總書記前後,氣場完全改變「判若兩人」,由「謙厚」變得「難以親近」,成為一人專政嘅統治者。

          

在1980年代末期,垂秀夫就曾經被派駐在中國,在2020年9月至2023年12月又再次被派駐中國,擔任日本駐中國大使。當時外界將 垂秀夫視為歷任日本大使之中「態度最強硬者」,甚至有「北京最驚嘅日本人」嘅稱號,令北京外交圈以及日媒行家印象深刻。

          

長篇回憶錄分「上、下」兩期刊登,垂秀夫在當中提到,已故日本首相 安倍晉三在卸任後就發表「台灣有事就是日本有事」一言。冇幾耐,中國外交部就立即召見佢以示不滿。垂秀夫一度不與理會,直到中方「語帶威脅」表示,如果你唔出面,以後中方將拒絕日方所有嘅會面,垂秀夫只好接受召見。

          

垂秀夫話,當時中方派出中國外交部長助理兼發言人 華春瑩出面召見,華春瑩當面向佢發表長篇大論。垂秀夫話,雖然自己仍好有禮貌咁恭喜 華春瑩升任部長助理,但華春瑩就依然唔俾面,繼續臭臉以對並不斷重複中方「在台灣議題上」嘅史觀、說詞,垂秀夫完全唔客氣咁嚴詞反駁,令華春瑩當場「詞窮」,唔知點答話好。

          

之後冇幾耐,在2022年2月21號,《光明日報》評論部副主任 董郁玉,在北京「新僑飯店」被官方逮捕,與董生共進午餐嘅一名日本外交官,都被公安帶走拘留。隨後華春瑩出面向媒體表示,日方外交官在中國從事「與身分不符」嘅活動,垂秀夫即刻向中國外交部提出抗議。而之後會見佢嘅外交部長助理 吳江浩,都係重複華春瑩嘅講法,垂秀夫憤怒批評中方「指鹿為馬」,並聯同13國大使表態反對中方此舉,中國先釋放呢名日本外交官。

          

垂秀夫表示,在出任大使期間,曾多次邀請熟識嘅中國知識分子用餐,但受邀者多數在壓力之下婉拒出席。而大使館在每年3月嘅「日本天皇誕辰」都會舉辦交流活動,多位受邀者同樣在當局嘅壓力之下,回絕到場出席。

          

而垂秀夫在回憶錄表示,自己係一位攝影愛好者,在任內都曾經在北京舉辦攝影展。但由於駐日大使身份,其攝影展被中國外交部「阻止」,即使後來改用「個人名義」舉辦,但現場仍然有10幾個公安駐守在展場門外,展廳大門更被公安鎖上,唔俾一般民眾進入,期間更發生「強行摘除相片」嘅事件,垂秀夫認為係當局想要搞事,令佢不愉快。

          

垂秀夫甚至指控北京使出各種「下三濫」手段,在日本使館人員經常光顧嘅日本料理店內安裝竊聽器。垂秀夫表示,即使同駐北京嘅日媒食餐飯,閒話家常嘅內容,都要避免提及敏感嘅政治話題。

          

垂秀夫對 習近平嘅睇法,係回憶錄嘅重點之一。根據佢回憶,在2009年習近平以中國國家副主席嘅身份訪日,晉見日本天皇 明仁嘅期間,垂秀夫正擔任日本外務省「中國蒙古課長」。當時佢負責安排賓客前往首相官邸出席晚宴,由時人多時間被耽誤,賓客之一嘅習近平雖然被迫要等候,但面容並冇顯示出不滿或不悅,令佢對習近平留下「謙厚」嘅印象。

          

但垂秀夫指,在多年後嘅2015年,佢陪同時任自民黨總務會長 二階俊博訪中時,習近平已經成為最高領導人。時隔6年嘅會面,習近平嘅「氣場」已經完全改變,身邊警衛顯著增加,維安戒備比前任領導人 胡錦濤更加森嚴,變得更難以近距離接觸。

          

垂秀夫指,由鄧小平掌權時期開始,中國雖然呈現「經濟高度發展」,但實際上只不過係「幻影」。中國民眾應該要思考,點解中國非要交俾中國共產黨來統治?佢認為,習近平對「中國發展道路」嘅抉擇有兩條路可以選擇,一條路線係 鄧小平嘅「經濟高速成長」路線,另一條就係返返去 毛澤東嘅「強國」路線。

          

而綜合習近平咁多年嘅作為,事實已經證明,習近平選擇「高度集權」嘅後者,要「全黨、全軍」都一致對總書記服從。垂秀夫指出,在擔任駐中國大使之前嘅幾年,佢已經得到資訊,知道中共政治局常委,在年底都必須向習近平「交報告」。任何政治局常委搭乘嘅「專列火車」或者「專用飛機」,都必須得到總書記辦公室嘅嚴格審查。換言之,政治局常委之間已非「平起平坐」,除咗習近平,其他常委全部都在「一人之下」。

          

垂秀夫認為,在習近平上任之後,中國嘅國家戰略目標已經完全改變,「國家安全」被置於首位,咁樣嘅作法同中國嘅經濟發展相互違背。在同歐美等國家嘅駐中國大使傾計之間,大家都認為習近平嘅作法,係「犧牲經濟」來換取「國家安全」嘅目標,而其中嘅「反間諜法」就是最好嘅範例,而各國大使對此都相當不理解。

          

垂秀夫表示,畢竟習近平已經年過七旬,而日本作為中國嘅鄰國,應該為「後習近平時代」預作準備,防範各種可能發生嘅變化。其中,多吸引中國民眾去日本旅遊,甚至招攬 馬雲等級別嘅中國富豪去日本發展,都係可以考慮嘅施行方針。

發佈時間: 2024年02月19日 15:20
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.