加拿大驅逐中國僑務辦前官員! 從事間諜活動!欺凌恐嚇華人!
加拿大驅逐中國僑務辦前官員! 從事間諜活動!欺凌恐嚇華人!

根據RFI《法國國際廣播電台》30號報導,加拿大媒體《環球新聞》最近曝光一單事件,事件涉及中國僑務辦「前官員」,遭到加拿大當局下令驅逐出境,理由係該位「前官員」參與咗中國政府對外國嘅干涉計畫。

         

根據加拿大《環球新聞》(global news)1月29號報道,加拿大「移民同難民局」發現一位叫 張晶(Jing Zhang)嘅女士,曾經為中國國務院「僑務辦公室」(OCAO)工作,「僑務辦公室」被加方認為在加拿大從事間諜活動。

         

加拿大移民局官員表示,加方並冇堅稱或指控張女犯下間諜罪,但移民同難民局認為,張女作為員工或官員之一,在「中國僑務辦」工作咗11年,對「中國僑務辦」施壓華人、華僑等活動,肯定知情並曾經參與其中。

         

報道話,根據一份長達32頁嘅裁決書,內容指出,中華人民共和國(PRC)利用《海外反腐敗公約》,壓制海外「持不同政見」嘅異議人士。加拿大移民同難民局補充話,無論在而家或者過去,中國僑辦都有份參與中共在加拿大「針對個人或團體」嘅「間諜活動」。

         

加拿大《環球新聞》在1月29號表示,以「國家安全」為由驅逐張女嘅決定,在舊年8月28號就已經下達通知,但直至最近先公布。張女僱請溫哥華律師出面,但記者無法聯繫到律師出面說明。

         

報道指出,加拿大當局在6個月以前已經做出裁決,但就懷疑張女是否已經被驅逐出境。有記者向加拿大「邊境服務局」諮詢,「邊境服務局」表示,不對單獨案件發表評論。

         

加拿大《環球新聞》表示,在中國被指控「對加拿大進行大規模干預」之後,加拿大當局成立咗一個專門委員會,任務包括「審查俄羅斯」以及「其他外國或非國家行為者」嘅相關活動。

         

報道補充話,中共干預加國選舉只不過係威脅嘅一部分,加拿大國家安全面臨更廣泛嘅威脅。仲有部分外國政府,尤其係中國政府,對加拿大人嘅欺凌或恐嚇。

         

被中國政府鎖定成為目標嘅活動人士,成日遭遇中共嘅騷擾、恐嚇或勒索,而佢哋在中國嘅家人,亦會受到中共威脅。「中國僑務辦」就係中共指定「幹壞事」嘅海外機構之一,其任務就係要消除「挑戰中共政權」嘅「潛在威脅」或「敵對言論」。

         

加拿大移民同難民事務局表示,有證據表明,「中國僑務辦公室」嘅「關鍵作用」,就係要收集有關中國境外「持不同政見者」或「少數民族」嘅情報。

         

在張女嘅聽證會上,加拿大「邊境服務局」指出,「中國僑務辦」已經滲透到加拿大各地華人區,打壓反對者。其中亦包括「台灣人、維吾爾族人、法輪功學員、華裔加拿大公民」。

         

加拿大「邊防局」表示,「中國僑務辦」嘅目的就是透過「鼓動、威懾、監視」等手段,將「海外華人」嘅社會同行為「管起來」,行為同「間諜活動」冇分別。

         

加拿大移民同難民局表示,張女自2008至2019年在揚州「中國國務院僑務辦」工作,先擔任咗「公共關係主任」,之後擔任「海外聯絡主任」。

         

判決書指出,張女每年都會「回國」出差至少四次,並同中國國內或僑民中嘅「目標群體」進行接觸。所謂嘅「目標人群」包括「學生、知名人士、政府人員、團體、商界」等人士。

         

佢參與嘅活動、接觸嘅人,都顯示出佢做緊帶有「任務性質」嘅「僑務」工作。加拿大移民同難民局解釋,所謂「僑務」就係一種「馬列主義」策略,利用人與人之間嘅關係,來消除對共產黨嘅批評。

         

報道話,張女擁有法律學位,而佢持續「淡化」在「中國僑務」所扮演嘅「角色」,並將責任歸咎於「翻譯錯誤」。張女辯稱,加拿大曾多次向佢批出簽證,中間都未曾出現過任何問題。

         

報道揭露,張女在一場線上舉行嘅聽證會中,否認自己係「中國僑務辦」成員,但加方唔相信佢嘅證詞,裁定佢就係中國僑辦嘅成員,並認定佢係「在知情嘅情況下」參與相關滲透活動,並支持相關任務嘅目標。

         

加國有關「中國僑務辦」嘅調查正在持續開展,有一位叫 張勇(Yong Zhang)嘅「中國僑辦」前工作人員,在2022年因類似嘅調查,被加拿大認定「拒絕入境」。2018 年,「中國僑務辦」被認定為中國統戰部嘅組織之一,加拿大聯邦官員指控「中國統戰部」持續在加拿大開展活動。

         

根據加拿大「安全情報局」稱,中國共產黨利用統戰部(UFWD)「扼殺批評」,並操縱加拿大華人社區。而早前有報導指,中國政府在「溫哥華、多倫多、蒙特利」等城市,設立「海外警務派出所」,加拿大「皇家騎警」亦持續對相關事件展開調查,要徹底揭露中共在海外嘅各種卑劣作為。

發佈時間: 2024年01月31日 14:58
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.