中國絕無濫用反間諜法! 國安:係外資企業自己做賊心虛! 中國必定長期向好!因為低處未算低!
中國絕無濫用反間諜法! 國安:係外資企業自己做賊心虛! 中國必定長期向好!因為低處未算低!

根據台灣《中央社》6號報導,中國在今年實施新修《反間諜法》,今年有唔少外國企業陸續叫停在中國嘅業務,外界認為係新版《反間諜法》嚇走咗外資。而中國國安部今日親上火線,在微信上叫囂反駁,否認相關法律對外資造成寒蟬效應,並指責美國利用「經濟間諜法」打壓國際競爭對手。

       

中國國安部6號在微信公眾號發文,以標題「《反間諜法》破壞營商環境的4大謬誤」撰寫「護航文」,在文中指責外界惡意攻擊抹黑,渲染在中國正常商業活動可能被當作間諜行為。

       

文章分上、下集,在今次公佈嘅上集內容,國安提出兩點謬誤。其一、《反間諜法》惡化營商環境,對外企在中國投資造成「寒蟬效應」。其二、《反間諜法》將商業數據視為「國家秘密」,正常獲取商業訊息之行為可能被當作「間諜活動」。

       

國安部「如履薄冰」,「費盡心思」撰寫呢篇唱好中國經濟嘅「護航文」。國安引用「商務部數據」指,今年前十個月,全中國新設立外商投資企業有4萬1947間,年增32.1%。但就絕口不提中國自疫情初始至今,總共倒閉幾多間企業。根據2021年末《南華早報》引述《華爾街日報》報導,當年前11個月倒閉中小企業總計超過437萬間。

       

另外仲引述數據指,今年新增「貨運航線」有180條,其中歐美和亞洲航線超過一半;中歐班列共發車1萬4562列、運送貨物157.9萬貨櫃,年增分別6%和9%。而國安部「識少少扮代表」,完全忽略疫情三年嘅深層影響,不提「貨運量」斷崖式下跌,亦不提「運量基數」大不如前嘅事實。

       

國安部宣稱,以上數據都係外商在中國投資興業「堅定信心」嘅體現,亦係中國經濟「長期向好」嘅最佳證明。國安部潤飾自己嘅歪理稱,世界各國「依法維護國家安全」,既係通行做法,亦係正當之舉。國安部批評,炒作《反間諜法》破壞營商環境、加速經濟脫鉤,純屬「歪理邪說、顛倒黑白」。

       

國安部又宣稱,《反間諜法》打擊嘅係極少數危害國家安全嘅「間諜行為」,不針對正常商業活動,不會對外企合法投資經營造成任何影響。國安部再次為自己辯護稱,外界將中國執法部門「依法調查間諜違法犯罪活動」稱為「打擊外資企業」,係「偷換概念、強盜邏輯」。

       

文章又話,中國《保守國家秘密法》中,列咗7類「國家秘密事項」,其中並不包括「商業秘密」,反間諜法規定嘅6類間諜行為,更加不涉及「正常獲取商業訊息」。任何將「國家秘密」同「商業秘密」混為一談,將「商業活動」同「間諜行為」強行掛鉤,都係「別用有心、混淆視聽」。

       

國安部仲掉返轉去指責美國,話美國在1996年公布嘅《經濟間諜法》中,將「盜竊商業秘密」作為一種間諜犯罪,規定最高10年監禁、500萬美元等罰則。又稱美國「濫用該法」打壓「國際競爭對手」,近年更加利用該法「羅織罪名、捏造證據」,連續炮製數十起所謂「中國經濟間諜案」。

       

中國今年發生咗幾宗「突擊搜查外資公司」、「拘留在華外籍員工」、「盤問外企中國籍員工」等事件,包括3月美國顧問企業「美思明智集團」(Mintz Group)北京辦事處員工被拘留,又有「貝恩公司」(Bain & Company)在上海嘅辦事處被突擊搜查,其後國際專業諮詢公司「凱盛融英」(Capvision)亦遭到突擊搜查。

       

根據《美國之音》近日報導,今年第三季,外商在中國投資出現咗118億美元嘅赤字,係自1998年有紀錄以來,第一次產生負增長;而外資離開中國後流向咗東南亞。

       

除咗外國資金離開中國,今年以來亦有唔少美企撤離中國,例如美國科技研究公司「弗雷斯特研究公司」(Forrester Research),選擇於今年關閉在中國嘅辦公室。而總部設於美國佛羅里達州嘅「雲計算軟體集團」(Cloud Software Group),同樣宣布於12月將停止在中國嘅所有新交易。

       

而根據英國《金融時報》(Financial Times)11月4號嘅披露,總部設於華盛頓嘅諮詢顧問公司「蓋洛普」(Gallup)亦將會撤出中國,並關閉在中國嘅所有辦公室。

發佈時間: 2023年12月06日 13:48
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.