根據台灣《中央社》18號引述中國財經網媒《市界》報導指，世茂「深港國際中心」樓高668公尺號稱「中國第一高樓」，「深港國際中心」隸屬於「世茂集團」旗下嘅「新里程實業公司」資產。但舊年「世茂集團」爆發財務危機，中國第一高樓被迫要停工，難逃成為爛尾樓嘅命運，兩度拍賣都乏人問津。

根據中國財經網媒《市界》18號報導，深圳市 龍崗區 龍城街道「12宗地土地使用權以及地上物件」16號在「京東拍賣」流標。今次並非世茂「深港國際中心」首次拍賣，上次在今年7月5號，以起拍價人民幣130億4400萬元，相當於估值163億500萬元嘅8折，並附帶6億5200萬元嘅保證金來起拍。

而中媒《界面新聞》報道指，今次拍賣嘅標的物，係世茂於深圳最大嘅綜合體項目「深港國際中心」嘅大部分資產，世茂係在2017年底以239.43億元高價拿到呢塊地，當時標價創下深圳土地拍賣史上第二高嘅總價紀錄。而根據目前標的物嘅土地不動產證登記價係176.2億元，而評估價則為149.78億元，加上地上建築物評估價係13.26億元，整體評估價得到163.05億元。外界指，呢一筆拍賣資產，係7年以來最大估值嘅司法拍賣。

《市界》續稱，今次第2次拍賣，由104億3500萬元開始叫價，比首次拍賣價再降咗26億元，相當於評估價打64折。而兩次嘅拍賣分別吸引咗3萬人以及近1萬人關注，但是始終都冇人願意出手承接。京東拍賣平台最終於11月16號上晝10點宣佈拍賣結束，因冇人出價而再次流拍。有「中國第一高樓」美譽嘅「深港國際中心」項目繼續爛尾。

根據《市界》報導引述，有從事「不良資產收購」嘅資深從業者匿名表示，就算世茂「深港國際中心」係標榜價值超過百億嘅資產，但當前中國房地產購買熱度「全面熄火」仲多房企都自顧不暇，幾乎冇人買得起咁龐大嘅項目，即使業者有實力，單係當前嘅世道之下，多數都係採取觀望姿態。

世茂「新里程實業」債務纏身。根據「天眼查APP」顯示，目前世茂新里程共有11個案件待執行，總金額高達91億元，呢啲風險都會影響專案嘅走向，企業一班唔夠膽輕易冒進。

「協眾策略管理集團」聯合創始人 黃立衝表示，由世茂「深港國際中心」再次流標可知，目前深圳的辦公樓已經出現咗「供需失衡」嘅狀況，無數「甲級辦公室」空置率達到了30%，前海等地區甚至達到了40%。

回顧2017年，世茂以240億元購得呢一塊土地，在規劃之中，首期項目開工3年之內要完成進度50%，整體項目預計要5年之內完工。但如今竟然淪為爛尾嘅中國第一高樓。當時「世茂集團」董事局副主席 許世壇，仲「雄心勃勃」咁表示：呢個計畫做好之後，預計可供貨700億元以上，一年收租就可以達到30億元以上。

「世茂集團」深陷債務危機，第一高樓「深圳世茂深港中心大廈」施工進度遲滯，根據網上傳出相片，大樓工地空無一人，現場雜草叢生一片混亂，大樓高度距離封頂仲有一段距離，雖然有三分一嘅部分已經安裝咗玻璃牆，但有一大部分都仍然係鋼筋外露。該大廈項目在今年5月，被北京市高級人民法院裁定，列為重點風險建案，據稱前後已有261戶業主向有關部門投訴，另有22間供應商以及施工單位起訴，要查封深港國際中心嘅資產。

今年4月，「世茂集團」董事長 許榮茂，已經出售咗自己名下在倫敦金融城嘅大樓。至於「深港國際中心」要點麼收尾，陷入自救難嘅世茂已經可以話係「自顧不暇」。自2021年12月起，世茂名下嘅上海外灘茂悅大酒店、廣州亞運城項目股權、上海世茂佘山洲際酒店、北京分鐘寺土地等，都陸續被上架求售。

而所謂高樓爛尾，在中國早已不是新鮮事，根據《自由亞洲電台》跟進報導，除咗世茂「深港國際中心」，「高銀地產」預計要投資600億元嘅「天津117大廈」都係另一項備受矚目嘅爛尾高樓，該大廈原計劃要興建117層樓，呢座樓高597米嘅摩天大樓在2008年開始動工， 預計2015年封頂。

但其後相關資金鏈斷裂，如今大廈外嘅玻璃牆只安裝咗不到三分之二，完工時間遙遙無期。 而中國政府為避免各地城巿繼續起高樓，並將高樓當作經濟成長嘅象徵，在舊年就已經推出咗「限高令」，強調不得新建500米以上嘅建築，即使係新建250米以上嘅建築，都要進行嚴格限制以及審核。