根據《美國之音》16號報導，《等著在夜裡被逮捕》（Waiting to Be Arrested at Night）一書（註：美國之音譯《夜裡等待被捕：一位維吾爾詩人的中國種族滅絕回憶錄》），作者 塔希爾·哈木特·伊茲吉爾（Tahir Hamut Izgil）在今個星期迎來兩件令佢雀躍亦欣慰嘅好消息。星期三，《華盛頓郵報》宣佈，《等著在夜裡被逮捕》一書，入選「50部著名非小說類作品」，而一日之前，《時代》雜誌同樣宣布，該書入選「2023年百大必讀書籍」。

伊茲吉爾曾表示，中共一直透過「勞動改造」同「再教育」，試圖改變人民。佢曾經於1996年，在準備前往土耳其攻讀碩士時，因為攜帶咗幾本書，遭到當局以「攜帶機密同非法材料出境」為由，將佢逮捕入獄。佢於2017年下半年同屋企人前往美國，之後一直定居在弗吉尼亞州。用「維吾爾語」撰寫嘅回憶錄，在朋友及中國問題學者 約書亞·弗里曼（Joshua L. Freeman）嘅幫助下，將全文翻譯成英文。由美國「企鵝出版社」於今年8月出版。

根據台灣《關鍵評論網》8月3號引述《時代雜誌》嘅報導，作者伊茲吉爾表示，詩歌係維吾爾族生活中非常重要嘅一部分，而且自細到大都圍繞著，佢在高中時期開始寫詩，於1986年首次在《喀什公報》上刊登。而譯者 約書亞・弗里曼（Joshua L. Freeman），在受訪時提及書中嘅三大要點，一、詩歌在維吾爾人生活中嘅中心地位。二、當今新疆的鎮壓情況。以及三、促使伊茲吉爾同屋企人逃亡嘅故事。

對於著作受到全球權威媒體嘅認可，伊茲吉爾於受訪時表示，可以睇到自己嘅書被《華盛頓郵報》同《時代》雜誌等受人尊敬嘅報刊選中，我感到非常榮幸同高興。佢表示，被評為「50部著名非小說類作品」同「2023年百大必讀書籍」之一，感到高興之餘，獲選嘅真正根源在於著作嘅「潛在影響」受到評審認可。

伊茲吉爾向《美國之音》表示，著作被選為著名必讀書籍名單，起初係為自己感到自豪。而感到高興嘅原因不單僅係個人被認可，而是，媒體承認我嘅書係熱門讀物之一，唔單止可以幫助我嘅著作吸引更多讀者，更加有助於提高全球對維吾爾種族滅絕嘅認識。

對於伊茲吉爾來說，媒體嘅認可超越咗佢嘅個人成就；今次著作獲選，代表咗國際社會對維吾爾人嘅經歷，有更加廣泛嘅認可，為共同定義「維吾爾人」嘅故事，在鬥爭同勝利方面提供咗獨特嘅視角。伊茲吉爾表示，當世界注意到我所講述嘅內容時，我嘅回憶錄將會證明，在中國種族滅絕所帶來嘅挑戰中，維吾爾人所表現出嘅韌性。

近年出現更多證據顯示，中國在西北新疆區域，進行大規模種族社會改造，利用大規模移入漢族嘅方式，強逼維吾爾族通婚，放棄信樣接受漢文化，而在針對維族等少數民族嘅「新疆再教育營」，在當地大規模逮補、拘留、關禁維族人，獄中不只有暴利虐待、強逼勞動等反人類罪行為，甚至出現對女仔嘅騷擾、性侵、強致絕育等非人暴力行為。

儘管北京一再否認有不當行為存在，並將「種族滅絕」同「反人類罪」嘅指控怒斥為「謊言、捏造」，中國亦多次拒絕聯合國人權辦公室，針對新疆地區「自由、不受限」嘅公開調查。其中，對伊茲吉爾嘅回憶錄獲得美媒認可，中國駐美大使館發言人 劉鵬宇就大批：嗰本書係「虛假敘述」。佢批評西方「寧願相信虛假敘述」，不願意相信「中國對外發布嘅真相」。

舊年5月，聯合國人權事務高級專員 米歇爾·巴切萊特，獲准前往中國會見習近平，並「在中方安排之下」對新疆進行所謂「短暫訪問」。在各方壓力之下，巴切萊特於8月即將卸任前，終於公布咗調查報告，但僅只使用「可能構成反人類罪」來形容中國在新疆嘅行徑。但早於2021年，前美國總統特朗普就任嘅最後一日，時任國務卿蓬佩奧對外表示，美國認定中國正在對維族等穆斯林少數民族實施「種族滅絕」，而拜登上任之後，對於「種族滅絕」嘅定性一樣表示同意。

《華盛頓郵報》丹·基恩(Dan Keane)評論《等著在夜裡被逮捕》為「清晰而安靜的恐怖回憶錄」。基恩形容呢本書係對「2017 年中國大拘押嘅深刻描述」。基恩表示，在回憶錄中，伊茲吉爾對消失在集中營中嘅朋友，充滿咗令人心碎嘅敬意，但卻一再回到令人毛骨悚然嘅沈默時刻，幸存者嘅痛苦同內疚，在佢冷靜謹慎嘅字裡行間中悶燒，佢嘅詩歌爆發出火焰。

作者 伊茲吉爾介紹指，在過去幾個月之中，著作被翻譯成荷蘭語以及中文，而跟住仲有15個語言已簽約等待翻譯。佢正在準備緊第二本書，新書將會講述佢在中國監獄嘅親身經歷，並將會提及監獄中嘅勞動改造。伊茲吉爾話，有讀者向佢反應，書中提及嘅監獄歲月比較少，而佢想要填補呢個空白，讓外界多啲了解90年代，中國嘅監獄生活係點樣。