韓國大型財團韓華集團近期動作頻頻，先有旗下5間美國子公司被中國列入制裁名單，跟住又被外媒揭發正積極研發並計劃向菲律賓出售新型反艦彈道飛彈，目標係協助東南亞國家提升海上防衛能力。事件迅即引起中、美、韓三方關注，分析指呢個舉動可能令區域緊張再度升溫。

中國商務部喺本月14日宣佈，將韓華海洋株式會社旗下5間位於美國嘅子公司列入反制清單，理由係呢啲公司涉嫌支持美國政府針對中國海事、造船同物流行業展開嘅「301調查」。中方強調對此「強烈不滿、堅決反對」。有分析認為，呢次制裁反映咗北京對韓華近年同美方軍工合作愈趨緊密嘅不滿，特別係佢喺印太地區防務佈局入面嘅角色越嚟越重要。

韓華係韓國十大企業集團之一，主力業務包括造船、國防同能源。去年，該集團宣布投資50億美元喺美國費城造船廠，響應韓國政府推動嘅「讓美國造船再次偉大」計劃，被外界視為韓美軍事及產業合作嘅延伸。

與此同時，美國軍事媒體《海軍新聞》披露，韓華計劃向菲律賓及其他沿海國家推銷新研發嘅反艦彈道飛彈，希望喺2028年前完成技術開發。據報，呢款飛彈射程約160公里，配備整合式尋標器，能精準鎖定海上目標。韓華代表指，開發新飛彈係為回應「客戶對反艦能力持續增長嘅需求」。

報道又指出，呢款飛彈會同韓華研製嘅K239「天橆」多管火箭系統配合使用。菲律賓陸軍早前已透露，正考慮將「天橆」納入火砲現代化計劃，而韓華亦表示會升級系統，使其具備發射反艦飛彈嘅能力。事實上，韓華喺去年馬尼拉舉行嘅亞洲防衛安全展上，已經首次公開展示該款武器原型，顯示其早有意圖進軍菲律賓防務市場。

《英文南華早報》引述美國哈德遜研究所高級研究員歐德高指出，韓華嘅舉動顯示首爾正「積極支持地區盟友抗衡中國嘅海上擴張」，並且與美國嘅印太戰略保持緊密一致。佢認為，若韓華成功與菲律賓合作，可能會促使越南、印尼等同樣面對中國壓力嘅國家，考慮購買類似系統。

不過，歐德高同時警告，呢項軍售計劃有潛在升級風險。佢指出，中國可能視菲律賓採購韓華飛彈為挑釁舉動，尤其係如果該系統被用於美菲聯合軍演，恐怕會刺激北京喺南海採取更具攻勢嘅軍事部署，甚至加強當地前哨基地嘅軍事化行動。