今年嘅諾貝爾和平獎即將揭曉，而全球視線之一就落喺兩位香港人身上——《壹傳媒》創辦人黎智英同前支聯會副主席鄒幸彤。根據挪威諾貝爾委員會公布，本屆一共有338個候選者，包括244名個人同94個組織。依照規定，完整提名名單要保密至少五十年，不過提名人可以自行公開。

黎智英今年已經係第三次獲提名，由美國國會及行政當局中國委員會嘅兩位共同主席——共和黨眾議員史密斯同民主黨參議員默克利聯名提名。佢哋喺信中指出，黎智英多年嚟喺和平、自由同人權領域嘅貢獻獲國際肯定，為香港嘅民主同新聞自由付出極大代價。信中亦同時提名四名被中共拘禁嘅中國維權人士，包括維吾爾學者伊力哈、蒙古族社運人士哈達、基督教牧師王怡，以及記者黃雪琴。

信中強調，呢五人都係因為堅持人權同自由而被任意拘禁，「佢哋為他人權利挺身而出，卻付出巨大個人同家庭代價」，希望藉頒獎向世界傳遞訊息：「喺中共統治下生活嘅人，對和平同自由嘅渴望，與全球人民一樣。」

另一位香港入圍者鄒幸彤，今年由挪威自由黨領袖梅爾比（提名。梅爾比形容佢喺充滿壓迫同危險嘅環境下仍然堅持為人權同民主奮鬥，「成就傑出」。佢指出，鄒幸彤因《港區國安法》入獄，象徵北京摧毀香港自由與法治，「國際社會繼續關注呢件事非常重要」。其實，鄒幸彤前年亦曾同陳日君、黃之鋒等人一齊被提名，以表彰佢哋捍衞香港自治同人權。

除咗港人之外，今年嘅提名名單亦包括多位國際政治人物。外媒報道，美國總統特朗普由以色列總理內塔尼亞胡同巴基斯坦政府 提名角逐。特朗普多次公開表示渴望獲得和平獎，聲稱自己「結束七場戰爭」，包括巴基斯坦與印度、以色列與伊朗等，不過說法受到外界質疑。

上個月佢仲話，如果自己攞唔到獎，係「美國嘅侮辱」，又強調「唔係想要獎，而係希望國家得到佢」。有分析認為，特朗普或想藉此同前總統奧巴馬「爭一口氣」，但由於佢任內退出《巴黎氣候協定》及發動貿易戰等舉動違背和平原則，獲獎機會被指非常渺茫。

另外，為蘇丹內戰地區提供救援嘅「蘇丹緊急應對室」（Emergency Response Room in Sudan）、「國際婦女和平與自由聯盟」（WILPF）、聯合國難民署（UNHCR）同聯合國兒童基金會（UNICEF）都被視為潛在得主。