查理·柯克一直強調，遇到佢認為嘅「壞主意」，最好嘅方法就係直接挑戰，而唔係默默接受。佢嘅職業生涯基本上就係圍繞呢個信念。18歲嗰年，柯克退學創辦咗後來成為美國最有影響力嘅保守派青年組織——「美國轉捩點」。9月10號，佢喺猶他州一間大學校園，正正做緊令佢成名嘅事——同自由派辯論，但期間遇槍擊身亡。

警方暫時未拘捕或公佈疑犯身份。美國總統特朗普喺社交平台稱柯克係「傳奇人物」，仲話「冇人好似佢咁了解美國年輕人」。呢宗命案發生喺近年一連串帶有政治動機嘅襲擊之後，其中包括去年針對特朗普本人的兩次暗殺行動。

柯克喺短短31年人生之中，成就唔少。美國轉捩點早期，佢爭取到嘅共和黨金主最初難免懷疑，眼前呢個瘦削嘅青年，連領帶都未識打。但好快佢哋就俾柯克嘅鬥志同執著打動，紛紛掏腰包支持。結果證明佢哋賭啱左。柯克好快展現出強大嘅組織能力，令美國轉捩點成為龐然大物。《紐約時報》報道，2023年美國轉捩點連同遊說部門嘅收入達到9,240萬美元。佢哋喺850間大學設有分會，定期舉辦大型活動，邀請多位保守派大人物參與，包括特朗普本人。

柯克嘅影響力，仲來自於佢作為保守派「代言人」嘅形象。喺TikTok上一份調查顯示，2024年投票支持特朗普嘅30歲以下用戶當中，柯克係最受信任嘅人物。佢可能幫助特朗普重新入主白宮。去屆選舉，副總統賀錦麗喺年輕選民嘅得票率比拜登2020年低12個百分點，係所有年齡層中跌幅最大。據報特朗普曾將呢個轉變部分歸功於柯克。

柯克完全有能力以影響力進軍政壇。美國轉捩點去年投放數千萬美元喺動員選民嘅行動，柯克亦協助迫使共和黨全國委員會主席下台。特朗普連任之後，柯克仲幫手審核內閣人選。佢一度成為黨內權力掮客。

但柯克始終堅稱，自己唔想參選。佢認為自己嘅使命更重大——佢相信「覺醒主義」會摧毀美國，而拯救國家嘅關鍵唔喺選票，而喺文化戰場，例如大學校園。作為虔誠基督徒，佢希望繼續走訪各大校園，挑戰自由派學生嘅觀念，宣揚佢眼中嘅「批判種族理論」同「性別意識形態」之害，呼籲年輕人組織家庭，將美國「交還俾耶穌基督」。

柯克言辭一向激烈，亦反映咗美國政壇日益嚴重嘅兩極化。近年針對政界人士嘅襲擊、威脅同暗殺計劃不斷出現，包括縱火襲擊賓州州長沙皮羅、綁架密芝根州長韋特默嘅陰謀、企圖暗殺最高法院大法官卡瓦諾，以及2022年眾議院前議長佩洛西寓所遇襲，導致其丈夫被鐵鎚重擊。今年六月，明尼蘇達州一名州眾議員同丈夫喺屋企遇害。特朗普亦僥倖喺賓州一次競選集會中逃過暗殺。

民調顯示，大部分美國人都拒絕政治暴力，支持者唔到一成，而且左右兩派比例差唔多。但喺一個槍枝氾濫嘅國家，要製造駭人聽聞嘅血案，往往只需要一個人。智庫專家基林菲爾德指出，當公共輿論傳遞出「只要你公開行兇，就會得到關注甚至讚揚」呢種信號時，就會有人受到驅使。

史丹福大學社會學家韋勒認為，兩個因素影響政治暴力嘅支持度：第一係政治菁英表態反對時，民眾多數會跟隨；第二係兩派對對方容忍暴力程度嘅誤判。事實上，無論民主黨定共和黨，多數人都痛恨暴力，但彼此卻以為對方默許，結果形成惡性循環。

韋勒指出，政治暴力嘅支持度雖然唔算高，但仍然過高，要扭轉就靠更多理性交流。柯克自己亦承認呢點。佢曾經被一位冷淡嘅女學生問：「你點解要嚟我哋學校？」佢堅定回應：「當人哋唔再肯辯論，暴力就會出現。」