菲律賓海岸防衞隊海警船「蘇祿號」（BRP Suluan，MRRV-4406）本月11號喺南海執勤期間，遭到中國海警船同解放軍海軍驅逐艦兩面夾擊，但最終成功靈活閃避，反而令中國兩艘船隻相撞。菲方其後公開事發影片，並喺「蘇祿號」返航後，為全體船員舉行授勳儀式。

菲律賓海防隊指揮官加雲（Ronnie Gil Gavan）昨日喺馬尼拉港迎接返航嘅「蘇祿號」船員，親自為全員頒授獎章，表揚佢哋喺菲國領海內維護安全嘅英勇表現，並稱：「你哋已經證明，我哋確實係維護海上和平最持久嘅先鋒。」

根據菲方公布嘅影片，喺中國海警船同自家驅逐艦相撞前一刻，海警船艦艏可見5個人，有人見勢唔對開始向後走。隨後兩艦猛烈相撞，畫面中疑似出現血霧，仲將海水染紅。有中國軍事相關微博帳號當晚貼出3支蠟燭同哭臉符號，引起網民推測今次意外可能導致中國海警船至少3人死亡。

事發之後，中國海警局只係簡短回應，話當日依法對菲律賓船隻採取跟監、外逼、攔阻等「必要措施」予以驅離，並強調現場行動屬於專業規範同正當合法，冇提及撞船同人員傷亡情況。

據報，「蘇祿號」當日被中國海警船同驅逐艦包夾時，一度處於極不利位置，但仍然成功脫困，導致中國海警船艦艏嚴重受損，無法繼續航行。