英國智庫「英中透視」（UK-China Transparency）近日發表咗一份調查報告，指控中國政府透過一間曾被美國列入黑名單嘅私募基金，喺2017年成功收購英國第二大晶片公司Imagination Technologies。報告指，中共可能其後將該公司嘅關鍵技術轉移畀與中國及俄羅斯政府有密切聯繫嘅企業，技術涉及人工智能同軍工產業，引發國際社會高度關注。

報告指出，喺2017年，私募基金Canyon Bridge以約5.5億英鎊（約53.5億港元）收購咗Imagination。該基金主要嘅資金來源係「中國國新控股有限公司」（China Reform），一間專注發展戰略性產業嘅國有資本公司，涉及國防及國家安全領域投資。Canyon Bridge早喺收購之前，已經因國家安全問題被美國列入黑名單。

Imagination主要負責設計微晶片，佢嘅技術喺人工智能系統發展中扮演重要角色。知情人士向「英中透視」透露，從2020年開始，Imagination曾向三間中國公司轉移不尋常嘅技術，其中包括「壁仞科技」同「摩爾綫程」（Moore Threads）。呢兩間公司分別被視為中國版嘅NVIDIA（英偉達），而美國政府已喺2023年底將佢哋列入制裁名單。

報告進一步指出，「壁仞科技」自2019年成立以嚟，喺2021年接受咗「中俄投資基金」嘅資助。至於「摩爾綫程」，其主要股東劉姍姍同時係「潤宇科技」嘅董事，而後者據報曾向中國航天科技集團提供GPU，用於軍事用途。

報告仲聚焦於一家英國顧問公司「Global Counsel」。該公司喺2020年曾為Canyon Bridge提供建議，協助安撫英國政商界嘅持份者。值得一提嘅係，呢間顧問公司由工黨成員、英國前首席大臣文德森（Baron Peter Mandelson）創立。文德森當時仲擔任由英國外交部資助嘅「英中協會」主席。

對於報告指控，Imagination喺報告發表之前否認曾向中國公司轉移技術。「Global Counsel」則回應指，「中國國新」並非其客戶，仲話創辦人文德森喺2019年同該基金會面純屬巧合。