廣東潮汕地區近日因應國務院巡查組展開安全生產同消防考核，多個城市，包括潮州同汕頭，密集發通知，要求轄區內嘅商舖自查消防、環保同衛生狀況。唔少商戶驚通過唔到檢查會被罰款，選擇暫時停業。部分使用明火嘅夜市攤檔被指示停業一個星期，搞到當地一度變得冷冷清清，坊間甚至用「鬼城」形容。

潮汕多個商業區近日出現大量商舖關門嘅情況。網民拍片顯示，潮州牌坊街同埋汕頭嘅「龍眼南夜市」都冷冷清清。龍眼南夜市攤主群組入面有消息話，應街道辦要求，所有使用明火嘅攤檔要喺本月22日至28日暫停經營。有攤主喺群組度講：「驚有事發生，不如休息幾日。」

有潮州網民分享到，「平時好熱鬧嘅牌坊街，依家比疫情嗰陣仲靜，呢啲景象十年未見，真係令人唏噓。」仲有商舖以搞笑理由掛告示，例如「豬腳畀人偷咗，休息一日」或者「兩公婆嘈交，暫停營業」，但呢啲幽默背後，其實係對罰款嘅無奈同憂慮。

隨住消息喺網上瘋傳，有人話潮州通知要喺20至22日進行明查暗訪，話如果發現消防同環保唔合格，商舖最高會被罰5萬蚊。有網民批評：「開門可能被罰幾萬蚊，唔開門避避風頭更好。」

「網傳廣東潮汕現關門潮」呢個話題喺上星期六（23日）一度登上微博熱搜。不過，官方回應話，只有「個別商戶」因為自身原因停業，仲強調依家已經恢復正常營業。但呢個說法畀唔少當地居民質疑，有網民揶揄：「成條街都拉閘，仲話係個別商戶？」

為咗平息輿論，潮州市政府之後緊急通知商戶恢復營業，話大規模停業行為已經畀上級批評，仲警告話如果唔係因為客觀原因拒檢，會面臨更嚴厲嘅處罰。另外，警方表示，部分網民因為散播「麵包店被罰5萬」、「豬腳湯被罰6萬」呢啲未經核實或者造謠嘅消息，已經處以行政處罰，呼籲市民唔好隨便傳播不實信息，避免擾亂社會秩序。

據了解，為咗迎接國務院巡查組嘅考核，潮汕多地展開多輪安全檢查，如果商戶唔合格就要暫停生產。部分商戶坦言，寧願唔開幾日都唔想冒險比人罰款，「開門可能蝕更多」。當地官員承認檢查力度係比較大，但強調係為咗符合國家安全政策嘅要求，並話會適當調整措施，盡量減少對市民日常生活嘅影響。