俄烏戰爭踏入第三年，戰火依然未熄，各方指控愈演愈烈。最近烏克蘭方面再一次質疑中國喺戰爭中扮演嘅角色，引起國際社會關注。總統澤連斯基公開指控話，俄羅斯境內嘅無人機生產設施有中國公民參與，仲話可能涉及俄方喺中國政府唔知情之下，非法取得中國無人機技術。烏克蘭已經就此事向中國提出嚴正關切，日前仲召見中國駐烏大使馬升琨。

烏克蘭外交部副部長佩列彼尼斯表示，中方人員參與俄方軍事生產，已經嚴重違反中烏之間嘅合作同互信。他指出，有中國公司喺俄羅斯協助製造軍事產品，對烏克蘭安全構成威脅。烏方已經向中國交咗相關證據，警告唔好再做任何可能進一步破壞雙邊關係嘅行動。佩列彼尼斯話，如果中方繼續現時做法，未來兩國政治同經濟合作都會受影響。

澤連斯基早喺今個月9號出席記者會時已經提過，有跡象顯示俄羅斯喺社交媒體招募中國人入伍，佢話根據情報分析，中國政府可能早已知情。去到上星期四（17號），佢再進一步公開指責中國向俄羅斯提供軍事援助，仲話有中國代表參與俄羅斯境內嘅武器生產。烏克蘭政府隨即宣佈制裁三間涉事中國企業，顯示事件嚴重性。

面對外界壓力，中國外交部喺18號作出回應。發言人林劍嚴正否認所有指控，強調中國一直堅持中立立場，主張和平解決同促進停火，批評有關指責係「無端指控」同「政治操弄」，又話中方反對任何形式嘅惡意中傷。

雖然中國自稱中立，但由2022年戰事爆發以嚟，中方從未公開譴責俄羅斯。喺西方國家紛紛對俄實施制裁之際，中俄貿易反而越嚟越頻繁，雙方關係持續緊密。與此同時，烏克蘭政府近月亦多次指出中方涉入戰事，包括話多達155名中國公民喺烏克蘭境內協助俄軍，引起國際社會對中國「中立」立場嘅質疑。

根據外電報道，澤連斯基今個星期較早前講話語氣明顯軟化，佢表示，即使俄方真係偷咗中國無人機技術，都未必係中方授意，佢已要求烏方官員盡快將資料交畀中國。外界分析指，呢種態度可能反映烏方唔想完全得罪中國，希望保留外交空間，同時爭取國際更多支持。