實施只係短短六日就搞到滿城風雨嘅巴士強制佩戴安全帶新例，30號出現戲劇性轉折。運輸及物流局局長陳美寶下晝突然見記者，承認問過律政司意見後，發現相關法律條文喺技術上存在「不足之處」，當局決定先刪除有關條文。即係話由即日起將會無法律要求強制乘客喺巴士上戴安全帶，等當局「完善」條文同諮詢立法會及公眾後，先會重新推出。

呢項由港府「行政主導」硬推嘅政策，自實施以嚟亂象頻生。連日嚟發生多宗事故，包括有乘客因為畀安全帶鎖死而「被困」長達 45 分鐘要消防救，亦有市民因為趕唔切解帶讓座而同人嘈交。最新更有消息踢爆，原來現行法律條文有大窿，根本無明文規定喺相關條例實施前嘅「舊巴士」上必須強制戴帶。面對全城怒火同法律漏洞，港府最終喺實施唔夠一個禮拜就要急煞停。

雖然實質上係「暫緩」執行，但陳美寶喺唔夠 7 分鐘嘅記者會上，全程絕口不提「暫緩」兩個字，只係話會先刪除條文，等優化安排後再作諮詢。佢強調當局好重視社會意見，重申立法嘅「初心」係為乘客提供多一重保障。對於外界質疑由法例草擬、立法會審議至官員解說，成個流程都無發現條文有咁明顯嘅不足，陳美寶無正面回應，淨係賴係草擬時嘅技術問題。

針對一個「不足」嘅政策搞到全城一鑊泡，政府會唔會道歉或者有官員需要問責？喺記者多次追問下，陳美寶嘅回應顯得支吾以對，淨係話：「就住法律條文喺草擬時技術不足，以致未能夠完全反映到我哋個立法原意，以至喺我哋執行嘅時候市民嘅了解上面呢，會產生咗一啲唔同嘅睇法，亦都係唔清楚呢，喺呢一方面呢，我都要承認係唔理想嘅。」至於道歉同問責就統統欠奉。

一直關注事件嘅前區議員陳嘉朗形容，政府自撤回垃圾徵費後已經「好無面」，今次為咗保住面子，即使政策要急煞停都「死亦唔講撤回兩隻字」。佢認為：「成件事仲未完，只係暫時拆咗政治炸彈，唔係條例已死，而係入咗 I C U。」佢批評政府處理手法肉酸，令市民無所適從。