美軍核動力航母「林肯號」打擊群已經殺到去中東水域，局勢劍拔弩張。美國總統特朗普28號喺社交平台「真相社交」發文，證實呢支規模龐大嘅艦隊已經準備就緒，並向德黑蘭發出最後通牒，敦促對方盡快返番去談判桌就核問題達成協議，如果唔係美方下一次嘅軍事打擊將會「更加慘烈」。

特朗普喺帖文形容，今次由「林肯號」領軍嘅艦隊行動迅速、士氣高昂，規模仲遠超早前派去委內瑞拉嘅艦隊，強調美軍已作好充分準備，隨時可以迅速完成任務，必要時將以「雷霆之勢」訴諸武力。佢重提早前代號「午夜鐵錘行動」嘅軍事行動已經令伊朗遭受重創，警告德黑蘭唔好畀歷史重演，強調時間無多，刻不容緩，雙方應盡快達成一份「唔擁有核武」且對各方有利嘅公平交易。

面對美方施壓，伊朗方面態度強硬。伊朗常駐聯合國代表團隨即喺社交平台 X 轉發特朗普帖文並反擊，警告若受逼迫，將以「前所未有嘅力度」捍衛國家安全。伊朗方又寸美國以前貿貿然捲入阿富汗同伊拉克戰爭，嘥咗逾 7 萬億美元兼搞到 7,000 幾個美軍喪生，重申伊朗願喺相互尊重和利益嘅基礎上進行對話。雖然白宮官員向記者聲稱，若伊朗願意對話，美方持開放態度，但伊朗官方媒體引述外交部長阿拉格齊澄清，近日並無同特朗普特使威特科夫有任何聯繫，亦未提出談判請求。

今次軍事部署正值伊朗國內局勢動盪及核危機升溫之際。早前伊朗當局對全國反政府示威進行血腥鎮壓，令美伊緊張關係急劇升級，該支艦隊遂由亞太地區緊急調往中東。特朗普曾多次警告，若當局殺害示威者將會干預，雖然目前因經濟及政治高壓引發嘅示威浪潮已稍為平息，但特朗普已表明，若伊朗喺舊年 6 月遭美以空襲關鍵核設施後試圖重啟核計劃，美方將採取行動。

據美媒報道，特朗普已下令喺可能發動打擊前加強海灣地區嘅軍事部署，令伊朗、以色列及周邊國家近日均保持高度戒備。雖然兩名美國官員向路透社證實「林肯號」及其支援艦艇已抵達，但白宮內部消息指特朗普仲未作出最終開火決定，仍傾向尋求外交途徑。目前美伊之間雖無實質談判，但沙特阿拉伯、土耳其同卡塔爾等國正擔任中間人傳遞訊息。值得留意嘅係，沙特同阿聯酋已公開表態，唔會畀美國用佢哋嘅領空對伊朗實施打擊。