有中國學者近日撰文分析，中共中央軍委副主席張又俠嘅落馬，絕非一場普通嘅整肅，而係由連串危機引發嘅斷然舉措，其性質同其他落馬高官截然不同。文章指出，張又俠作為中共政治局委員入面除咗習近平之外唯一嘅「太子黨」，兩人父輩有深厚交情，張更一度被視為對習絕對忠誠、政治地位打風都打唔甩嘅軍中「巨擘」。不過，習近平最終決定對佢郁手，背後涉及解放軍淪為「紙老虎」、斬斷舊勢力、掌握貪腐「黑材料」以及出於政治安全考量嘅「先發制人」等四大關鍵因素，呢一著徹底顛覆咗北京傳統政治庇護體系嘅運作邏輯。

文章分析指，習近平對張又俠嘅清洗，本質上係最高領導人對「失敗嘅戰爭準備」與內心「深度不安」嘅激烈反應。習近平想吞併台灣嘅野心係真嘅，但作為實現目標工具嘅解放軍，喺張又俠領導下卻被證明係空洞嘅。火箭軍頻傳醜聞，例如用注水代替導彈燃料、發射井蓋打唔開等，證實咗張嘅政敵何衛東之前關於軍隊作戰能力虛假嘅警告並非空穴來風。呢啲問題唔係單純技術故障，而係根植於張又俠多年來領導裝備體系嘅系統性缺陷。前國防部長李尚福嘅落馬，更暴露咗軍隊被外敵嚴重滲透嘅漏洞。對要求軍隊「能打勝仗」嘅習近平嚟講，呢樣嘢好似俄軍喺烏克蘭慘敗咁當頭棒喝，若果繼續留用張又俠，佢嘅對台戰略恐被腐敗同無能癱瘓，所以選擇喺戰前執行清洗，以免開戰時先嚟崩潰。

此外，政治安全亦係關鍵考量。文章認為，張又俠係軍中根深蒂固嘅「舊勢力」化身，佢錯綜複雜嘅人際網絡同「山頭」，構建咗一個將利益最大化置於備戰之上嘅集團。隨著以何衛東、苗華為首嘅「東南幫」被清除，若保留張又俠將導致佢個派系獨大。習近平需要一支真正效忠嘅軍隊，藉此清除怯戰嘅「和平主義者」，並啟用缺乏背景、唔敢話「不」嘅新指揮官，即便要承受短期嘅指揮真空，呢個都係一種「破壞性嘅建設」。

喺激烈嘅軍委內鬥中，敵對派系無疑向習近平呈上咗大量針對張又俠嘅「黑材料」，包括其家族財富細節及龐大關係網。呢種透過賄賂維持嘅權力同習近平要求嘅「絕對服從」格格不入。文章直指，習近平深知 1971 年林彪企圖政變嘅歷史教訓，喺獨裁體制中，一個自知受猜疑嘅掌權將領係最危險嘅變數。為咗確保 2027 年中共二十一大尋求第四個任期嘅政治安全，習近平必須「先發制人」，喺張又俠被逼入絕境、可能動員關係網叛逃或進行「斬首」行動前落手。此舉最終目的係威嚇全軍幹部屈服，確保內部無人能挑戰其權威及實現「國家統一」嘅時間表。