中央軍委副主席張又俠及委員劉振立畀國防部公告立案調查後，解放軍內部嘅動向備受關注。翻查資料，以前中央軍委前副主席徐才厚同郭伯雄分別喺 2014年同 2015年畀人開除黨籍後，軍方高層同各大軍區將領都好快公開表態，「擁護中央決定」。不過，今次兩名軍委高層「落馬」後，直至今日下晝，解放軍五大戰區、四大兵種同其他部隊，仲未透過官方渠道集體表態「支持中央決定」，軍方氣氛顯得異常詭異同沉寂。

與此同時，京畿重地嘅保安級別明顯升級，局勢顯得唔係好平靜。據網上流傳影片及導航地圖資料顯示，今日凌晨零時許，有網民透過高德地圖查閱北京周邊交通狀況，發現通往北京嘅主要高速公路，包括承廊高速、京港澳高速、京藏高速及京哈高速，多個進京方向路段罕有咁同時顯示為代表塞車嘅紅色，疑似出現大規模交通管控措施。

首都核心區域嘅戒備亦見森嚴。天安門廣場喺前日清晨舉行升旗禮期間，雖然現場遊客人數唔多，但保安規模未見鬆懈。除咗常規武警外，現場仲部署咗大量戴住黑帽嘅黑衣人，佢哋以固定距離排列，背對升旗台、面向群眾進行監控；公安車輛就泊喺人群邊緣配合部署。中南海新華門外同樣戒備森嚴，見到有武警同黑衣人喺門口站崗或巡邏。

中共高層嘅人事變動亦喺官方網絡上見到端倪。截至今日下晝，央視網嘅「中共中央領導人」及「國家領導人」欄目入面，已經刪除咗張又俠同劉振立嘅相片及名字。新華網嘅領導人框架圖中雖仍保留兩人相片，但相片下方嘅名已經點擊唔到連結；唯獨中央軍事委員會網站仍顯示兩人名字。

針對今次軍方高層震盪，華盛頓智庫「布魯金斯學會」中國問題專家辛強納形容消息「令人震驚」。佢分析指，事件意味著現屆領導層中「無人係真正安全」，即使係關係密切嘅親信，若果喺對黨領導嘅「忠誠」問題上存疑，都唔會享有任何保護傘。

至於中共總書記習近平嘅動向，佢自個多星期前喺北京同加拿大總理卡尼會面後，一度未有公開露面，直至央視周二發布片段，顯示佢喺人民大會堂接待到訪嘅芬蘭總理奧爾波，打破神隱傳聞。目前外界正密切注視軍方會唔會喺短期內打破沉默，就中央嘅調查決定作出表態。