巴士強制佩戴安全帶新例喺剛過去嘅周日正式生效，26號迎來實施後嘅首個工作日，點知新政一推出即刻亂象頻生，激起唔少民憤。由於巴士車廂空間逼夾加上硬件設計老化等問題，唔少乘客反映佩戴過程極之狼狽，甚至出現「被困」落唔到車嘅情況。面對公眾質疑，運輸及物流局局長陳美寶強調新例並非旨在懲罰乘客，執法將會「情、理、法」兼備，初期以教育及宣傳為主；不過，有份審議法例嘅建制派議員見勢色唔對，紛紛急急腳「補鑊」，承認審議時低估咗實際操作難度，甚至建議暫緩執行。

新規定實施以嚟，社交平台湧現大量乘客投訴，矛頭直指配套不足及設計缺陷。有家長指出，現行巴士安全帶設計配合唔到細粒嘅小朋友，戴咗之後條帶勒住條頸同塊面，隨時搞出人命。此外，唔少舊款巴士嘅安全帶機件老化，經常出現「卡死」情況，有乘客拉極都扣唔到；亦有人準備落車嗰陣因為個扣失靈，或者因為被條帶綁住而撳唔到遠處嘅落車鐘，搞到落車極之狼狽。有傳媒實測發現，喺車廂咁窄嘅環境下，扣緊安全帶往往要雙手並用，對於「一抽二掕」、孭住背囊或者手抱嬰兒嘅乘客嚟講簡直係玩雜耍。有短途客坦言，除低背囊扣帶再解帶都已經到站，變相顧得呢樣失嗰樣；亦有手抱嬰兒嘅家長指，如果坐喺走廊位，當隔籬位乘客要落車嗰陣，被迫喺行駛中解帶讓座，險象環生。

除咗操作困難，公眾亦質疑新例存在邏輯矛盾。有市民指出，新例嚴格要求座位乘客配戴安全帶，但對風險更高嘅「企位」乘客卻無任何規管。據傳媒整理資料顯示，過去十年間涉及巴士意外嘅死者中，逾七成其實係「企位」乘客，令新例被質疑係本末倒置。對此，道路安全議會成員李耀培喺電台節目上為政策護航，用「出街鎖門」做比喻，話扣安全帶係防備措施，旨在保障乘客安全。

面對民怨發酵，多名建制派議員忽然做咗「事後孔明」。立法會交通事務委員會主席陳恒鑌承認，喺上屆審議時「低估」咗民間對設計及操作嘅反應，建議執行約半年後檢討；實政圓桌嘅莊豪鋒則建議初期以勸喻代替執法。前議員江玉歡更認為，香港市區巴士車速唔快，唔能夠照搬外國規定，建議政府暫緩執行一年以體察民情。

不過，翻查立法會紀錄，呢條爭議法例喺審議期間並未獲足夠重視。立法會舊年 9 月成立附屬法例小組審視時，成個過程僅喺一日內進行兩節共 3 個幾鐘頭嘅會議便「光速通過」，期間更打破慣例，未有舉行任何公聽會諮詢公眾。當時陳恒鑌明確支持修例及定額罰款，而今日建議「暫緩」嘅江玉歡當時亦未有就議題發言。

曾擔任油尖旺區議會交通及運輸事務委員會主席嘅陳嘉朗批評，呢場「安全帶之亂」反映立法會喺「愛國者治港」下失效，代議士未能真正代表民意為市民把關。佢指出，議員本應做好諮詢，若發現政府方案唔可行應「企硬」反對，而唔係喺法例通過後先嚟歸咎政府綑綁審議，失去咗將法例微調嘅機會。